مع مانجا (بلا نيلة): قليل من الحياء

إمبارح باليل موبايلي رن 

رقم غريب رديت 

- آلو. 

- آلو إزيك يانور. 

- الحمد لله مين معايا. 

- أنا أحمد بتاع المعادي .

- أفندم مش فاهمة 

- أنا اتكلمت معاكِ عالفيس من يومين 

- نعم !!!

- أنا أحمد بتاع المعادي 

- حضرتك أنا مش فاكراك وغالباً معرفكش ممكن أعرف جبت رقمي منين 

- جبته من الفيس 

- نعم !!!!

- أيوة جبت رقمك من بياناتك علي الفيس 

- آسفة والله مبتكلمش مع حد معرفوش 

تخيل وتخيلي نفسك كده واحد طلبك وبيقولك أنا أحمد بتاع المعادي وأنا قاعدة جنب جوزي يعني في ظروف تانية في ناس ممكن بيتها يتخرب بمكالمة لطيفة زي دي 

مش معني إن بياناتنا متاحة علي الفيس أنك تنتهك خصوصية الناس وتطلب أي حد علي مزاجك في أي وقت, التطفل ده حاجة مقرفة جداً ياريت يبقي في شوية أسمه إيه؟!,  ده أحترام علي شوية بتاع ده أدب ومعاهم قليل من الحياء. 

‫#‏بلانيلة‬

مع مانجا (بلا نيلة): الشاسية مية مية !

بعض الشباب لما بيجي يختار بنت عشان يتجوزها بيقعد بقي يعمل فيها مفتح وناصح ويتقمص دور كرومبو ويختبر أخلاقها ويقعد يسألها عرفت حد قبله ولا لأ؟ 

ويتكلم عنها كأنه بيشتري توكتوك! 

بص يلا البت دي أصلي والعداد بتاعها لسه زيرو والشاسية مية مية !

أنا بصراحة لما بشوف كده بفطس من الضحك, ليه بقي؟! 

ياعزيزي الحمار الصغنن أسئلتك التافهة دي البنت متدربة علي الإجابة عليها من وهي في اللفة يعني لو صايعة هتعرف تلبسك القرطاس المحترم, عارف ليه عشان أنت سبت الأسئلة المهمة !

أسألها كده لو جيتلك يوم وأنا مفصول من شغلي ومفيش في جيبي جنيه هتستحمليني ولا هتروحى لأهلك ؟!

طب أسألها لو تعبت أو جرالي حاجة هتقفي جنبي ولا لأ ؟

طب أسأل نفسك لو هي عدادها زيرو بس دمها يلطش ومتمسكة بالنيش أكتر ماهي متمسكة بيك ساعتها بقي هتعمل إيه بالعداد الزيرو يا قفل؟!

البنات حبايبي نفس الكلام تقوليلها فلان عريس تقولك عنده عربية شقته فين بيقبض كام أهم حاجة مقعدش مع أمه.

ياست الهبلة أسألي أخلاقه أزاي ؟

هيحترمك ويصونك ولا هيقضيها عطيات علي بيات... أعرفي لما بيتعصب بيبقي أزاي, ماهو أصله لو اتعصب عليكِ وأدالك بونية بوظ خلقتك, عربيته وشياكته مش هينفعوكِ في حاجة.

الصبر يارب 

‫#‏بلانيلة‬

مع مانجا (بلا نيلة): الباشا اللطخ

من يومين وأنا عالبحر حصل موقف كده لتشطيف بيبينلنا أننا محتاجين معجزة مش ثورة عشان نبقي أحسن. 

وأحنا قاعدين عالشط.

جه واحد مكتوب علي وشه أنه ظابط, جاي هو والمدام يستمتعوا بالبحر وجماله عااااادي. 

أنت هتعرف أنه ظابط من شكله وكرشه وشنبه وكلامه مع عمال الشط بأشارة من صوابعه وطرطوفة مناخيره علي رأي خالد الصاوي الهيبة فضاحة برضه. 

حلو هايل ...

قعدوا تحت الشمسية هو فرد كرشه علي بف من بتوع البحر والست ضربت المايوه البفتة وقاعدة تدهن صن بلوك وفرشو اسندوتشاتهم ومخلالاتهم وقرفهم, عادتشي برضه مع أنه ممنوع عشان دي شاطئ محترم. 

سيبك من ده كله عدي ولد صغير سنه ميزيدش عن عشر سنين بيبيع طواقي هاند ميد من بتاعة البلاج, الولد شايل شيلة ميقدرش عليها راجل ورجليه الصغننة بتشق طريقها بصعوبة في الرمل والشمس بس سيادة الظابط اللي معرفش رتبة أمه إيه, أصل مش مكتوب عالمايوه!, مستكفاش بالشقا المرسوم علي وش الولد, الست قالت عاوزة طاقية يا محسن ندهله خد ياولد الولد جه مبتسم وهو فاكر أنه لقي زبون بكام دي ب 75 جنيه الست شبطت في طاقيتين يعني مفروض الحساب 150 جنيه وبجد الحاجات تستاهل معمولة كويس وشكلها غالي. 

المهم أن سعادة الباشا اللطخ أخد الطواقي من الولد ورماله 20 جنيه عالأرض الولد لسة هيقوله ناقص فلوس راح ضاربه علي قفاه وقاله أمشي يالا من هنا الولد طبعا أترعب وجري. 

وطيت علي المدام وسألتها هو البيه ظابط راحت ضاحكة ضحكة رقيعة وقالتلي عرفتي منين قولتلها أصلهم بيبانوا من وساختهم 

‫#‏بلانيلة‬

مع مانجا (بلا نيلة):هبروميت سنة

الناس اللي بتعمل الحملات الإعلانية بتاعت الشامبو مطوروش نفسهم من هبروميت سنة مفيش أي أفكار, دايماً يجيبوا واحدة شعرها بشع قبل الشامبو وسبحان الله لا سحر و لا شعوذة غسلة واحدة وتبقى ماشية تهفهف. 

ماهو ياتحترموا عقولنا 

يا طوروا نفسكم شوية 

يابلاش إعلانات ووفروا الفلوس أحنا فهمنا أن كله صابون والأسماء بتختلف وخلاص. 

‫#‏بلانيلة‬

مع منجا (بلانيلة): مستعمرة العراة

مستعمرة العراة 

أستني بس متفرحش لما أعرفك عليهم 

في نوع كده من الأسر المصرية كنت فاكراهم انقرضوا بس طلعوا لسه موجودين وبيتكاثروا ! 

النوع ده بقي مسمعش عن حاجة أسمها خصوصية.

باب الشقة بتاعهم مفتوح 24 ساعة في اليوم سبع أيام في الأسبوع وده كان زمان علامة علي المحبة والتكاتف والوداد. 

دلوقت بقي علامة علي الغتاتة وعرض الفخاد. 

آه والله زمبؤلك كده هما طول اليوم فاتحين باب شقتهم اللي جنب شقتك وقاعدين براحتهم يعني الراجل بالفنلة والـ(لامؤاخذة) اللباس مش لاقية تعبير تاني عشان البوكسر لسة موصلش عندهم والست ماشاء الله ماشاء الله لابسة عريان ملط والأولاد كمان حرانين بيقي وبيعبروا عن شعورهم بالحر تقولي وإنتِ مالك يا نور هما حرين أقولك أنا أن باب الشقة لزم في باب الشقة وأنا ذنبي إيه أشوف كمية الفخاد دي كلها ليل نهار ده حتي مش كويس علي صحتي الوركية وبفكر أروح لدكتور أمراض وركية اتعالج عنده من كتر الوراك اللي بشوفها !

لأ وإيه صوتهم عالي وتليفزيونهم مفتوح ليل نهار وبياكلوا ويشربوا ويتخانقوا ويناموا وبيعملوا بي بي, كل حاجة بصوت عااااااالي جدا ويكأنما بيعملوا شير للعالم بأسلوب حياتهم الناس دي لا يمكن تموت موتة طبيعية أبداً 

‫#‏بلانيلة‬

مع مانجا (بلانيلة):جاري الحشري

الحج أبو حسن جاري كان قبل كده أشتكي لتيام أني بغني بصوت عالي وأنا قاعدة لوحدي في الشقة لما سمعني في المرة الأولي كنت بغني فلكلور (ماتولع الباجور يا زين علي أمك دخلة البوليس ولا دخلة أمك ) وكنت بهديها للبوتجاز وهو سمعني من شباك المنور المهم أن يومها تيام أحرجه بالذوق وجه قالي بس من ساعتها قررت أنتقم منه فبقيت أغني بالأنجلش بلهجة صعيدي بقيت أقول (عنبريك ماي قرد ساي يو لف مي اجين ) 

وطبعا بصوت عالي وطبعا هو عشان مركز معايا سمعني بس مفهمش حاجة غير كلمة بريك وكلمة قرد أنا بقي سمعته وهو بيتكلم عني و أنا نازلة الصبح 

بيقول لمراته 

_ياولية بقولك صعيدية زييينا 

_لع يابو حسن لغوتها غيرنا أنا معرفاش أما تجول إيييه 

_ياولية أما تجول بوريك يعني عاوزة قرص 

_يا ضنايا يا بتي تكونش أما تتوحم 

_لع دي جالت بوريك وقرد 

_يعني أيه ده يابو حسن 

_يعني كان معاها بوريك وخطفه القرد 

_تكونشي ملبوسة يابو حسن 

_اللهم أحفظنا ياولية لع شكلها هادية 

_لع يابوحسن أنا  اسمعها تقول سيلفي يبقي سيلفها مضايقها 

علي فكرة كنت بقول

C,est la vie 

ماهو أنا يا أجننهم يا يبطلوا يتصنتوا عالجيران ناس طيبين قوي يا خال. 

وعن بوريك ماي قرد 

‫#‏بلانيلة‬

مع مانجا (بلا نيلة): يابو الشريط الأحمر ياللي

يابو الشريط الأحمر ياللي 

الغنوة دي كنت بتتغني لظباط الشرطة زمان عشان كانوا حلوين ومؤدبين وولاد ناس.

طب هو ليه محدش بقي يغنيلهم دلوقتي؟ 

معرفش ليه؟! 

أكيد في تطوور جيني معين حصلهم, ليه الناس تبقي مش طايقاهم وبدل ما تغنيلهم بتدعي عليهم أمممممم !

الغنوة دي كانت قبل ما علي ابن الجنايني يبقي ظابط يا إنجي. 

ليه بقي عشان علي كان طول عمره بيتعامل معاملة ابن الجنايني حتي لما جه يحب والقلب له أحكام حب إنجي وإنجي أميرة أممممم توصلها زاي يا علي نطلعلها فوق, حاول ودخل كلية الشرطة وبرضه فضل ابن جنايني وفضلت هي أميرة.

خلاص بقي يبقي مافيش حل غير أني أخليها هي كمان بنت الجنايني تعمل إيه يا علي وتسوي إيه يا علي, أمممم أنا أعمل ثورة كده وكده قوم إيه؟!, الروس تتساوي والباشا أبو الأميرة يبقي زيه زي الريس عبد الواحد وبكده يطير من الفرحة لما أطلب أيد إنجي.

علي وأصحابه عملوا ثورة طربقوا البلد وأعادوا تخطيط نظامها الاجتماعي وخدوا الأرض من الباشا و أدوها للجنايني عشان يبقي أغني منه وينول الرضا. 

لكن للأسف كل ده مخلاش إنجي بنت جنايني ومخلاش علي يبقي أمير .

علي بقي حاقد وناقم علي المجتمع وقرر يطلع عين كل الناس عشان يفش غله بس وهو بيعمل كده ملاقاش حد يمارس عليه عقده غير الناس اللي من عينة أبوه الريس عبد الواحد لأن من جواه كاره كونه ابن جنايني وعاوز يلغي الفكرة دي من الوجود. 

فضل يعمل كده 60 سنة قهر وذل وتعذيب لكل ماهو جنايني جايز يشفي جرح كرامته اللي اتمسحت بحب إنجي.

لكن انجي محستش بيه اللي حسوا بيه كل ولاد الجنايني اللي مقدروش يبقوا ظباط فقرروا يثوروا عليه وياخدوا الكرباج من أيده ويطربقوا القسم علي دماغه. 

في المرة الأولي علي نجح عشان وهو بيعمل ثورته كان بيحلم بإنجي لابساله فستان الفرح بس في المرة التانية ولاد الجنايني فشلوا عشان مكانوش بيفكروا في إنجي ولا تفرق معاهم لأنهم بيحبوا سعاد وسعاد بتموت في الفوضي. 

حد فهم حاجة. 

‫#‏بلانيلة‬

مع مانجا بلا نيلة: ماما عاوزة جاز

و أنا ماشية النهاردة واحد أمور غلس عليا وقعد يقول كلام مش تمام, المهم طنشته بس برضه مش مبطل غلاسة رجعتله ووقفت قدامه وغمزتله وقولتله تعرف أنك أسد.

راح ضاحك بإنشكاح قوي رحت مكملة كلام وعارف الأسد أمه أسمها أيه ؟!

يلا ياحبيبي زمان ماما عاوزة جاز !

واكتشفت إن اللى بيعاكس ده حد ضعيف جداً وبيمارس ضعفه علي بنات الناس. 

متسكتيش وأديله علي دماغه.

 

#بلانيلة

مع مانجا (بلا نيلة): قذيفة مخدات

سرحت كده بعين الخيال وشوفت نفسي بعد عشر سنين قاعدة أذاكر لأبني الحبيب عبد الجبار تاريخ وألاقي الدرس بتاع الثورة مكتوب فيه كده. 

" هذا وقد حاول بعض أعداء الوطن والخونة والمرتزقة تكدير صفو الوطن وعزل الزعيم الجميل البطل وأدت تلك الزعزعة والطعطعة إلي نزول الزعيم عن الكرسي وصعود واحد كده أسمه مرسي وساد الفساد وضاقت الأحوال بالعباد وذاق الناس وبال أمرهم حتي جاء بطل من بلاد الأحلام أعاد الإستقرار وقتل الكفار وطلع من البحر شرار"

وأثناء ما أنا مستغرقة في قراءة درس الثورة اتفاجئي بالواد عبد الجبار يبدي اعتراض بقذيفة من المخدات قائلا :ماما أنتِ بتقولي كلام عبيط أصلاً. 

أنا أصلا معرفتش أربي عشان يرد عليا كده يلا الخلفة واللي بيخلفوها.

 

#بلانيلة

مع مانجا (بلا نيلة): بلد جميل وشعب عبيط !

كل ما تيجي فرصة وأتكلم مع حد من صحابي من دولة تانية يزعلني ويخرط علي قلبي بصل و آخر حاجة بقي الواد الإندونيسي صالح بيقوللي إيه بقي ؟

- أعرف نور عالم كله استفاد من ثورة مصري إلا مصري 

- أزاي بقي يا بوعيون ضيقين 

- أيه نور أنت مش واهد بالك أنك اتشقلطت 

" اتشقلطت !!!!!!!!!!!!!!!!! هي حصلت ياض اعلمك شعبي تطلعه عليا" 

- بص نور أنا هقولك 

- مصري عمل ثورة بلد كله بقي إضرب في بعضه وخراب خراب 

- الصين استفاد عمل أعلام وتيشرتات وكفر موبايل وفوانيس سيسي مرسي ولعب رابعة

- ماليزيا وتايلاند وتركيا أخد شوية السياحة اللي كانو بيجو عندكم 

- أثيوبيا لقي فرصة فسرق منكم النيل وسابكم تتنيلو 

- إمارات انتهز فرصة عشان يظهر في الصورة ويعمل معاكو واجب بطاطين وكده 

- أمريكا لقي حجة عشان يحشر مناخيره الطويلة في شؤن مصر والمنطقة كلها 

- سودان لقي فرصة عشان يسرق حلايب وشلاتين 

- حماس وإسرائيل بقوا لما يحبوا يضربوا بعض يضربوا سيناء بالمرة 

-  حتي قطر اللي محدش سمع عنها ولا حتي في طبق اليوم عملت زعيمة عربية 

- روسيا عاوزة تلحق حتة من التورتة إتفاقيات ومعاهدات في صالحها طبعا 

- وأنتوا لسة أعمل مسلسلات و أغنيات وفكر في كهربات مقطوعات 

- نور من غير زعل أنتوا بلد جميل وشعب عبيط !

- طب غور ياض يابن ،،،،،،،،،،،،،،،،،،،،، الأندونسية 

بصراحة الواد عنده حق 

#بلانيلة

Like

مع مانجا (بلا نيلة): لمبة شبرا اليتيمة!

عزيزي المسئول ابن المضايقة اللى أخترع حوار قطع الكهربا ساعة واتنين يومياً تخفيف أحمال.

أنت بتقطعها بالأربع ساعات عن مناطق شعبية زي شبرا وعين شمس والأرياف ودول أتخن بيت فيهم آخره تلاجة ومروحة يعني حتي لو شيلت من عندهم الكهربا خالص مش هتوفر حاجة. 

بينما سعادتك وبشهادة سكان المناطق الراقية, الزمالك, الدقي , الرحاب, مدينتي, الكهربا مش بتقطع عنهم ولا دقيقة مع أن كل بيت ما شاء الله 4 تكيييف و2 تلاجة غير باقي الأجهزة بحسبة بسيطة لو قطعت عنهم نص ساعة بس هما مش هيلحقوا يحسوا وهتوفر كهربا بالهبل.

ولا هي يعني اللمبة اليتيمة اللي في شبرا هي اللى حارقة وزارة الكهربا !

#بلانيلة

مع مانجا (بلا نيلة): اللى خلفوا أهلك

ذات مومنت لما حد من أصحابي يقولي أفتحي اللاب بسرعة في حاجة ضروري جداً تشوفيها و أقوم أجري وصوباعي بتخبط في رجل الترابيزة و أفتح اللاب الكهربا تقطع, أبدل البطارية وأنا بقول أكيد فيه مصيبة, ألاقيه باعتلي فيديو أقعد ربع ساعه أحاول أحمله ميتحملش غير بطلوع الروح وهو في هذه الأثناء عمال يزن ويقولي أفتحي بسرعة أفتح ألاقي ....

الفيديو بتاعه وهو بيرقص ع بشرة خير 

i feel like

يلعن أبو ظرافة عسل سلالة اللى خلفوا أهلك.

#بلانيلة

مع مانجا (بلا نيلة): شاب لتشيف!

كل فترة كده ألاقي شاب لتشيف من شوباب الفيس رافع صورة موزة أوروبية وكاتب تحتها شايفين البنات شكلهم إيه ده أحنا عندنا غفر. 

خد ياحبيبي ماتخافش مش همد أيدي عليك, الموزة الأوربية دي بتنزل الشارع تقابل شوباب زي اللوز من عينة جاستين بيبر وتوم كروز وبن أفليك والشباب دول فوق حلاوتهم مؤدبين متلاقيش واحد منهم بيحاول يغلس عليها فتبقي مبسوطة وبشرتها مرتاحة عشان كده حلاوتها بتزيد.

إنما البنت المصرية ياعين أمها تنزل الشارع تقابل علي علوكة وسيد كارع وزعبلاوي المفش اللى شكلهم يجيب صرع لا وإيه فوق إن شكلهم عار تاخد منهم بقي ألفاظ زبالة وتحرش والواحد فيهم فاكر نفسه رشدي أباظة فتبقي علي طول أعصابها مشدودة وحواجبها مرفوعة من الدهشة وبمرور الوقت وشها بيطبع علي كده, يبقي العيب في مين يا موز منك له؟!, أبقوا أرفعوا صور موزز بقي.

#بلانيلة

مع مانجا (بلا نيلة): المحسوس و الممسوس!

ذات مومنت منيلة بنيلة 

لما واحدة تكون مستلفة مني كتابين عشان تقراهم #الممسوس #الغرباء

واجي اخدهم منها تقولي انا خلصت الغربان ولسة ما قريتش المحبوس 

I FEEL LIKE 

ياشيخة عنك ما قريتي ابو ال علمك القراية لأبو ال عاوز يسلفك كتب 

#بلانيلة

مع مانجا (بلا نيلة): مطلوب منى أبقى وطنية!

ومطلوب مني أبقي وطنية و أحب الوطن.

الوطن ده سياتك ضن عليا ببق ميه نضيف وساقع أشربه بشوية رعاية طبية في مرضي بوظيفة تكفيني شر العوزة, ضن عليا حتي بأربع حيطان تلمني.

من ناحيتي عملت اللي عليا.

حفظت النشيد وحييت العلم وقولت القسم.

وذاكرت ونجحت واشتغلت وتعبت ومش طالبة من المحروس الوطن أي حاجة.

غير إنه يحترم إنسانيتي.

لما يبقي يحترم إنسانيتي أبقوا أسألوني عن وطنيتي. 

بالنوسبة للأخوة الشعراء بتوع مشربتش من نيلها وبلدي وإن جارت عليا عزيزة.

أحب أقولهم عزيزة دي ماشية علي حل شعرها !

ومبتحنش غير علي الحرامية. 

هتقولي الوطن النيل والهرم هقولك لما أعرف أشرب هعترف بالنيل ولما يبقي عندي بيت هبقي أحب قبور الملوك, محدش يسألني عن وطنيتي في وطن هدر إنسانيتي. 

#بلانيلة

مع مانجا (بلا نيلة): يا جناب البيه

كان فيه علي قناة CBC واحد من جهاز التحكم في شبكة الكهرباء بيقول بإبتسامة فشيخة كام حاجة يستحق عليهم أنه يترفع هو ورئيسه.

شوف ياسيدي حرررته بيقول أن المشكلة معروفة من سنة 90 طيب يعني بقالها 24 سنة معملتوش حاجة ليه يا ولاد المضايقة.

بيقول أنه لما بيجي يقطع الكهربا بيراعي أنه ميقطعش عن المناطق اللي فيها خدمات يعني لا بيقطع عن سفارة ولا مستشفي ولا قسم ولا مصلحة حكومية طيب هايل وجميل مع أنه مش صح قوي بس ماشي.

أمال بتقطع عن مين يا جناب البيه, بيقطع عن المناطق العشوائية والأرياف يعني هما محرومين من الخدمات كمان مستكتر عليهم شوية النور ولما تقطع عنهم هتوفر إيه يا محروس ده أتخن بيت فيهم لمبة ومروحة. 

لحد أمتي الغلابا هيدفعو فواتير الأغنيا بلد بنت #@#@#

#بلانيلة

مع مانجا (بلا نيلة):عزيزى مارك

عزيزي مارك بلغني أنك تاعب نفسك تحديثات لنظام الفيس ومجنن اللي خلفونا 

أولاً أحب أشكرك جداً بالنيابة عن صحابي وبالأصالة عن نفسي علي أختراع البلوك. 

وأحب أقولك كمل جميلك و أعملنا إيموشن بيتوووووووف عشان محتاجينه جداً!

و أوعدك هتلاقي الإقبال عليه بقي تاريخي !

والنعمة ياض يامارك لو عملته لأعملك حفلة واحتمال أسمي الواد عبدالجبار أبني علي إسمك يبقي مستر مارك عبد الجبار أسم مركب وكدهون !

#بلانيلة

مع مانجا (بلا نيلة): اللهجات الصعيدي حمادة

وأنا بكتب حكايات جدتي بلهجتها الصعيدية الحقيقية السليمة اكتشفت أن اللهجات الصعيدي حمادة واللى بيذاع في التليفزيون والسينما حمادة واقع من البدروم بجد مش عارفة بيجيبوا الهبل ده منين؟!, أنا عمري في حيااااااااااااااااااااااتي ماسمعت صعيدي بيقول دلوكيت وجرانب وكلام غااااااااااية في الهبل الله يكون في عون المشاهدين من الصعايدة أكيد مرارتهم بتتفقع !

#بلانيلة

مع مانجا (بلانيلة): الأفلام العربى القديمة

وبما أني من مدمني الأفلام العربي القديمة فدي ملاحظاتي
كل الأمهات أسمهم آمينة أو زينب
كل الأبهات أسمهم حسينأو عبد الصبور
كل الموظفين أسمهم طاهر أفندي
كل الشباب الحبيبة أسمهم أحمد
كل البنات الجامدة أسمهم مني
كل البنات اللي بينضحك عليهم والقهوة تفور أسمهم نعمة أو نعمت
البوليس بيجي أول ما تخلص الجريمة كأنك كنت مبلغ عن نفسك قبل ما تقتل
البواب لازم يكون أسمه عثمان
السفرجي لازم يكون أسمه عبده
الشغالة لازم تكون ملعب
ومع ذلك مش بزهق من الفرجة عليهم ومع ذلك برضه زمن الفن الجميل

#بلانيلة

مع مانجا (بلانيلة): أول ما ينزل من البيت !

أول ما أتجوزنا كان بمجرد ما ينزل من البيت يتصل بيا
- آلو
- آلو إيه نسيت حاجة
- نسيت أقولك بحبك ووحشتيني وبعدك علي عيني
- وأنت كمان
تعدي دقيقة ويتصل تاني
- آلو
- بحبك
وهكذا طول اليوم
ودلوقتي لسة برضه أول ما بينزل من البيت بيتصل
- آلو
- أنا مش لاقي جبنة رومي ولا مربي أجبلك بيض !
متحسبوش يابنات أن الجواز راحة !

#بلانيلة