والناس بتغسل همها فطين الغيطان
وقرص الشمس فى المية دهب سايل
وشجرة توت مع النسمة بتتمايل
وأنا قاعد فى ضل التوتة ع الترعة
ودايرة الساقية قدامى
لقيت وياها دار فكرى
وخدنى لأحلى أيامى
زمان لما
زمان الطيبة واللمة وأحلى أصحاب
من الكتاب على الفسحة وكورة شراب
فانوس رمضان وصوت مدفع بنستناه
وزينة فرح تتعلق على الأبواب
وليلة العيد يامحلاكى ياليلة العيد
وأحلى هدية وعيدية ولبس جديد
وفرحة عليها نتلاقى قريب وبعيد
تدوب الفرقة نتصافى مايبقى عتاب
وقعدة مصطبة حلوة فى ليلة صيف
و(أهلا مرحبا) بيها نلاقى الضيف
بشاى براد على المنقد بيحلى القول
وتحلى القعدة واللمة مع الأحباب
وصوت أمى بتدعيلى فى كل صباح
توصينى عشان يابنى تشوفها براح
على قد اللحاف مدد تعيش مرتاح
تلاقى الدنيا جيالك تدق الباب
وفجأة فى عز مافكرى واخدنى معاه
لقيت واحد ماكان ليا كلام وياه
جايبلى الشاى لقيت نفسى بقول (الله)
تعيشى يامصر دا طبعك صحيح غلاب
ليست هناك تعليقات:
إرسال تعليق