ماتقتلنيش انا زيك مصرى
سبنى انول الشهاده بأيد عدوى
ماتموتش جوايا حلمى
دا انت كنت فيه مشاركنى
انت باين عليك نستنى
انا اللى كنت واقف جنبك فى الميدان
انا اللى شيلتك
لما ضربوا علينا الغاز
وخنقك الدخان
انا اللى صليت جنبك
يوم جمعة الغضب
ودعينا على اللى خان
وانا اللى نمت جنبك ع الرصيف
مستنين يرحل الطغيان
وانت اللى غطتنى بشالك
يوم ما كنت انا بردان
كنا مدفين بعضنا
حَاسين بالأمان
وسوى شيلنا شهيد
مات وسطنا بأيد جبان
وانا اللى سلمت عليك بوستك
يوم ماسبنا بعضنا ف الميدان
افتكرتنى ولا اقول كمان
ارفع سلاحك عنى
متفرحش اللى قاعدين ف اللمان
وتعالى نكمل حلمنا
ونرجع ذى ماكنا زمان
لسه ثورتنا مخلصتش
لسه محتاجنا الميدان
ليست هناك تعليقات:
إرسال تعليق