بقلم الشاعر/ بيرم التونسى
إقطعوا إيد الحرامى
بس نوبه و احبسونى!
ون سرق واحد طماطمه,
و لا طوبه اشنقونى
الحرامى لما يسمع
بالسطور, يفزع, و يرجع
يشتغل, و يكون عصامى
اقطعوا إيد الحرامى
الحرامى تتركوه يسرق
و يهرب فى الحوارى
أو بصدفه تحبسوه ياكل
و يشرب سم هارى
من حبوبنا أو دمانا
اللى فايضه من الخزانه!
و يحامى له المحامى
اقطعوا إيد الحرامى
عندكم يا مسلمين
أحسن شريعة طبقوها
حاتقول الأفرنج دى
أجكام فظيعة ما يقولوها
اللى يسكن فى ودانيا
يرضى بالجارى علينا
انجليزى أو أنامى
اقطعوا إيد الحرامى
فى الحجاز ابن السعود
خلى الحفاير و المداين
تترمى من غير حرس فيها
الجواهر و الخزاين
حد عارضه بحجه دماغة
و لا قال له كلمة فارغه
من كلامهم او كلامى
اقطعوا إيد الحرامى
ع البوليس و السجن كام
مليون بندفع احسبوهم
و فروهم للسماد و الرى
أنفع وفروهم
و افتحوا بيهم مشاغل
للى عاطله و اللى عاطل
يكفى يا ناس التعامى
اقطعوا إيد الحرامى
فين يا أزهر فين رجالك
فين أسودك و اقتدراك
ياللى حكم الشرع من
أسباب وجودك و اشتهارك
و التشامخ و التسامى
اقطعوا إيد الحرامى
ليست هناك تعليقات:
إرسال تعليق