يونيو 2011
و الله العظيم انا محروق دمى و انا بكتب المقال ده و حاسس انى عايز اقول حاجات كتير قوى للى بيحصل دلوقتى فى مصر, للاسف ان نشاط محركى و مدعمى الثورة المضادة اصبحت اعلى و اقوى الان من الثورة المصرية و اصبحت مع الاسف و الرعب تحقق انتصارات قوية على ثورتنا الرائعة مش حتكلم عن مؤامرة و لا تواطوء و لا التفاف
انا حتكلم عن كارثة قادمة الينا اسرع من اى اسرع قطار فى العالم لتلقى فى البحر كل مكتسبات الثورة المصرية و تصعيد نجوم الثورة المضادة مع الندم و الحزن و الاسى و الجز على الاسنان
يعنى ايه ان العادلى يطس حكم اتناشر سنة و تغريمه اتنين مليون جنيه مصرى و مصادرة 450 الف دولار فقط وفق ما اعلنت الجزيرة و وفق ما جاء فى احد اعداد جريدة المصرى اليوم تغريمه عشرة مليون جنيه
و يعنى ايه انه ممكن يطعن فى الحكم الصادر بحقه و يطلع براءة !!!
يعنى ايه جرانة وزير السياحة الاسبق يطس خمس سنين سجن
فى السجن الملكى بورتو طرة اللى بيتعاملوا فيه كملوك و باشوات لم يفقدوا اى ميزة او استعباد لباقى المساجين
يعنى ايه الاحكام السخيفة المبتذلة دى , يعنى انا مش فاهم جهاز الكسب غير المشروع و الجهاز المركزى للمحاسبات و ايضا لجان التحقيق مش قادرة انها تأتى بدلائل و قرائن اجدع من كده شوية و لا هو تواطوء و استهبال بقى
و كمان العادلى ممكن يطعن فى الحكم يا حلاوة , دى ثورة انتوا فاهمين يعنى ايه ثورة يعنى متقبلش الاحاكم المبتذلة دى عايزين يقولوا دى حتبقى محاكمات سياسية
محاكمات غير عادلة
يقولوا اللى عايزين يقولوه
و لكن بقى الشعب قال كلمته بشان العادلى و هو اعدامه فى ميدان التحرير قدام الناس
و لو مكسنا شق التربح الغير مشروع للعادلى حنلاقى انه عمل من منصبه المليارات و فى الاخر آخر ما يتم مصادرته من امواله عشرة ملايين جنيه قابلة للتفاوض و الطعن و بعدين يتخفف الحكم و يطلع يعيش و يهيص بملياراته !!!!
اللى انا حقوله فيه ناس حتعلق عليه و تقول الواضح انى مولع بنظرية المؤامرة بس محدش حس بالرابط ما بين طس العادلى حكم اتناشر سنة سجن و حريق كنيسة امبابة و سقوط عشرة قتلى و اكتر من متين مصاب و اشتباكات طائفية بالرصاص الحى اللى حصلت بعد الحكم عليه مباشرة و كأنها رسالة تهديد يبثها لنا العادلى ان المضى قدما فى هذا الشان من شانه ان يتحول الى حرب طائفية و اهلية ما بين المسلمين و المسيحين لو صدر بحقه احكام أخرى
و جرانة اللى باع من اراضى الدولة ملايين الامتار المربعة من اراضى الدولة بواقع دولار للمتر بالامر المباشر ده يبقى أخره خمس سنين سجن و اللى كانت ثورته قبل ما يبقى وزير 100 مليون جنيه بقدرة قادر بعد ما مسك الوزارة بقت مليارات ايه مفيش حكم بشان مصادراتهم و لا القاضى اتعمى هو و لجنة التحقيق الخايبة
ده لو المتر بدولار زى ما بيقول كنت انا روحت اشتريت بقى عشر فدانين و لا خمستاشر فدان , ده كان كل شعب مصر راح اشترى , يا حلاوة يا بلاد بيع بالامر المباشر مش فى مزايدة و البيع باعلى سعر او حتى ايفاد لجنة تقييم اسعار و تحديد السعر و كل التجاوزات و الاهدار للمال العام ده و تكون النتيجة هى خمس سنين سجن القاضى ده بيستهبل و لا ايه نظامه بالضبط
و ان شاء الله سامح فهمى حيتحكم عليه بايه بسنة و نص و غض الطرف من باب الايمان عن 80 مليار دولار مهدرين على مصر فى صفقة الغاز الطبيعى لاسرائيل و اخرى بعشرين مليار دولار فى صفقة الغاز الطبيعى لاسبانيا
و يطعن فيها و ممكن يطلع براءة لأ و كمان بطل الثورة المصرية !!
و ممكن كمان الا نتفاجىء اذا تم الحكم على صفوت الشريف اللى كشفت لجنة التحقيق عنه امتلاكه هو و مراته و ابناءه لثلاثة و عشرين فيلا و حيكون الحكم عليه حلو و الله متقلقوش سيتم مصادرة جراح احد الفيلل لانها تدخل فى دائرة الكسب غير المشروع و بكده تسترد مصر اموالها المنهوبة و هيييييييه!!!!!!
و بالنسبة لمبارك الغلبان سيتم تغريمه 12 الف جنيه مصرى بواقع جنيه فى الاسبوع و مش بعيد يعملوا ليه اكتتاب شعبى لدفع الغرامة المالية فى الكسب الغير مشروع و اما بالنسبة لتورطه فى قتل المتظاهرين يا جماعة انت حصلكوا ايه على راى عادل الامام فى مسرحية الزعيم لما سالوه انت كنت فين اثناء الثورة قال اصلى كنت وقتها فى الحمام !!
و بكده مبارك يبقى برىء من تورطه فى قتل المتظاهرين و الله يرحم بقى الشهداء
الثورة الفرنسية لما حصلت ما اخدتش الملك الفرنسى على متن هليكوبتر عسكرى لشرم الشيخ و لما فكروا يحاسبوه من اين لك هذا قام اتمسكن و وقع فى الارض و قال قلبى و لا حتى ودوا ملك فرنسا على مستشفى شرم الشيخ الدولى و لا استعبط كبير الاطباء الشرعيين الفرنسى و بعدين عزلوه عشان يجى كبير الاطباء الشرعيين الجديد و يقول بكل بجاحة و سخافة انا لسه مكشفتش على مبارك و حالته الصحية و ان اسباب وفاة خالد سعيد هى ابتلاع لفافة و التشويه المرعب اللى فى وشه نتيجة لتشريح الجثة و انه كان المفروض يتعمل له عملية تجميل متقلقش نبقى نجيب دكتور التجميل اللى عمل عمليات التجميل لاليسا و نانسى عجرم عشان يظبطوه و كمان سنته المكسورة عمرها سنتين ده ناقص يقول و معايا شهادة ميلاد سنته اللى تثبت ذلك!!
يعنى بنطلع من دايرة استعباط صغيرة لدايرة استعباط اكبر لدايرة استعبط اكبر و اكبر و هيصة و هلما جرا
و بعدين المجلس العسكرى يعمل استفتاء على التعديلات الدستورية و بعدين بعد الناس ما تختلف مع بعضها و تنقسم حوالين نعم او لا يقوم يعلن المجلس عن قيامه بعمل اعلان دستورى من 63 مادة , يعنى كانوا بيهزروا معانا و لا ايه
و على الرغم من انى من ضمن الناس اللى صوتت بلا عشان يتعمل دستور جديد قبل الانتخابات البرلمانية و الرئاسية على ايد لجنة تاسيسية منتخبة لصياغة دستور جديد فيتم التصويت بنعم على التعديلات الدستورية باغلبية ساحقة على صياغة دستور جديد بعد انتخاب مجلس برلمانى يقوم المجلس العسكرى يعلن عن تشكيل لجنة تاسيسية من كل اطياف المجتمع لصياغة دستور جديد!!!!!!!
معناه ايه الكلام ده مع انى كنت من مؤيدين الاتجاه ده و لكن خلاص الاغلبية صوتت لصالح صياغة دستور جديد بعد الانتخابات البرلمانية يجى المجلس العسكرى و يعملها دلوقتى طيب ايه الحكمة انا مش فاهم بصراحة
و نيجى بقى لنقطى تانية تحرق الدم يعنى من اوسع ابواب حرق الدم, قالوا ان المظاهرات و الاعتصامات تشكل خطر على النمو الاقتصادى و ايضا الاستقرار فى البلاد طيب اهى وقفت المظاهرات و الاحتجاجات الى حد كبير و رغم ذلك لا فيه استقرار و لا فيه نمو اقتصادى و لا حتى ثبات اقتصادى و لكن انهيار و رعب و مؤشرات خطر لان اصلا كانت المشكلة مش فى المظاهرات و لكن فى الغياب الامنى الكامل
و شوية ضباط مستعبطين مش عايزين ينزلوا الشغل عشان زعلانين من الشعب اللى اتضح انه مش بيحبهم رغم انه كان كويس و ابن حلال , و قاعدين فى البيت مبسوطين بيتفرجوا على التليفزيون و بيشربوا جهينة بالموز و بيقبضوا مرتبهم بالكامل و علاوات و مكافات كمان علىمجهودهم الرائع فى الصحيان متأخر و مشاهدة التليفزيون طول النهار و الضباط اللى وقفا ينزلوا نصهم على الاقل ممتنع بشكل غير مباشر عن الشغل قاعدين قدام الاقسام حاطين رجل على رجل بيدخنوا السجاير و بيشربوا الشاى كانهم رايحين القهوة و ياخدوا بعضيهم آخر اليوم و يروحوا عشان يدوبك كده يشترى البطيخة و الجرنان و يروح بيته بقى!!!!
طيب مهو كل الشعب قال و طنطن و اتكلم و زعق فى حل الموضوع ده افتحوا باب التسجيل لخريجى حقوق اللى عددهم بالالوف و ياخدوا منهم تلات الاف نفر و يودوهم على كليات الشرطة المختلفة و اعطائهم دورات مكثفة مدتها تلات اشهر او خمس اشهر و بعدين يسلموهم العمل الفورى و بعدين قولنا الضباط اللى بيعملوا اعمال ادارية يتفضلوا يبطلوا أنتخة و ينزلوا الشوارع و الاقسام و يتم احالة الاعمال الادارية دى لناس مدنين بالكامل و العيال بتوع الدبلومات دول خدوا منهم خمس الاف كامناء شرطة و دربوهم خمس اشهر و نزلوهم الشغل
و جهاز الامن المركزى ده يتم حله بالكامل و اعادة توزيع ضابطه و المليون جندى اللى بتفتخروا بيهم على الاقسام عشان يسدوا العجز و تكون قوة امنية حقيقية تعيد الامن للبلاد طبعا الحلول دى كلها معروفة ليهم و مش غايبة عنهم و لكن التغاضى و التعامى عنها يا اما عن جهل او سوء نية وا نا بصراحة ارجح النقطة التانية و هى سوء النية للاسف الشديد و هو الرغبة فى تعميم حالة الغياب الامنى لترهيب الناس و ترويعهم عن النزول للشوارع و التظاهر فيها للمطالبة بحقوقهم و لادفاع عن مكتسبات الثورة و محاربة الفساد بدعوى الغياب الامنى المفتعل الذى لا اساس له من الصحة و من الممكن تدارك الامر و رفد كل الضباط الممتنعين عن النزول للعمل بحجة الانقطاع عن العمل و رفدهم لحرمانهم من اى امتيازات او قطع روابتهم اللى شكلها بتوصلهم لحد البيت عشان يجبروهم على النزول ثم هما مش عايزين ينزلوا ليه السبب واضح و بسيط و واضح وضوح الشمس و هما ان اغلب الضباط دول عليهم تار من نص شعب مصر على الاقل ما بين تعذيب و تلفيق تهم و اهانة و قتل و بلاوى تانية كتير
و بعدين ليه المجلس العسكرى لسه سايب مئات من ضباط امن الدولة احرار طلقاء ليه مش بيقبضوا عليهم كلهم حتى لو مش مفيش بحقهم ادلة واضحة تدينهم حتقولوا دى مبالغة منى و ظلم و تصليح الظلم بظلم لن يأتى لا بظلما اكبر و انا اقول ان الجهاز ده اساسا هو كله فى بعضه ظلم فى ظلم يبقى الكل يتقبض عليه و بعيدن نشوف مين بقى البرىء عشان هما السبب وراء اغلب الفتن اللى بتحصل فى مصر و الاضطرابات و هما المحركين الاساسين لخيوط الثورة المضادة و ليه المجلس العسكرى الى يومنا هذا متباطىء عن حل المجالس المحلية و البدء فى الكشف عن حسابات كل اعضاء المجالس المحلية الذين يصل عددهم الى خمسة و ستين الف مرتشى و ظالم و مفسد
و يعنى ايه يتم حل جهاز امن الدولة و بعدين يتم انشاء جهاز الامن الوطنى هو بقى على مبدأ سيب سوسو خد نادية و لا ايه يعنى هو انت لما تغير اسم فاكر ان احنا عبط و حنقعد نصفق لك , و بعدين تنقل العاملين بجهاز امن الدولة لجهاز الامن الوطنى هو استعباط بقى و لا استهبال و لا تواطوء و لا سوء نية مع سبق الاصرار و الترصد و بعيدن يتقال لا اصل ده جهاز لجمع المعلومات فقط و ليس من حقه التحقيق او الاعتقال او مسألة اى مواطن مش ده برضه اللى كانوا بيقولوه على جهاز امن الدولة و لا ايه
و يعنى ايه يكون وزير الداخلية راجل عمرة خمسة و سبعين سنة هما جايبينه عشان عارفين انه راجل غلبان محتاج اللى يفكره بميعاد الدوا و بيلعبوا بقى باسمه يعنى مفيش شب امور ابن حلال فى جهاز الشرطة قادر انه يمسك وزارة الداخلية و لا ايه و يكون مصحصح شوية و عنده افكار ابداعية و ليه المجلس العسكرى مصدر الطرشة لشباب الثورة و مش راصى يسمع منهم اى اقتراحات و لا فكر حتى ياخد منهم وزير و لا فراش وزير حتى فى الحكومة الانتقالية و لا حتى بيبص على رسايل الاس ام اس !!!!
يعنى ايه يتم حل الحزب الوطنى و التحفظ على مقراته و يسيبوا كل اعضاء الوطنى احرار طلقاء متظبطين متهنين مبسوطين يعملوا حزب جديد و كمان يدخلوا الانتخابات البرلمانية هو احنا مشكلتنا مع شوية مبانى و لا الاشخاص اللى جوا المبانى دى
هما دول جوهر القضية مش شوية مبانى و كراسى و كام سجادة !!
هما دول زيول و اذناب النظام السابق اللى عمالة تدير الثورة من جوا سجن طرة من خلال ازناب الوطنى اللى قاعدين مبرطعين بره السجن و ينسقوا مع البلطجية عشان يعيثوا فى الارض فسادا و قتلا و تدميرا و اشعال فتن بين الناس بمتين جنيه بس و الله يا بلاش
يعنى انا بقى كمواطن بسيط بقبض على قدى اعملى جمعية بالفين جنيه و اعمل بيهم احلى فتنة و الله رخيصة و بسيطة قوى
من الاخر اهم سؤال يلخص كل القرف و حرق الدم ده هما عايزين منا ايه بالضبط ؟
ليست هناك تعليقات:
إرسال تعليق