كلاكيت أول مرة
يعنى إيه طرف تالت؟
فى أكثر التعريفات شهرة للطرف التالت هو أنه أصابع خفية – أو أجندة داخلية و خارجية – قوى خفية .... ألخ و هى تعنى إجمالا طرف ما خفى يريد الإضرار العمد بمصالح مصر و زعزعة الاستقرار و تعطيل نهضة البلاد و تحولها نحو الديموقراطية ( الله على بعرف أقول كلام كبير قوى)
مين هما بقى الطرف التالت؟
الطرف التالت هما لحد دلوقتى لم يتم الاعلان عنهم عشان دول لازم دايمن ميبقوش معروفين لانك لو عرفتهم دلوقتى يبقى حرقت المسلسل التركى اللى احنا عايشين فيه و مش راضى يخلص لحد دلوقتى و عرضه مستمر لستة اشهر اخرى
طيب نعرف الطرف التالت أزاى؟
يعنى جهاز المخابرات العامة و الأمن الوطنى و القوات المسلحة و جهاز الشرطة العريق بجلالة قدرها معرفتش مين الطرف الخفى و حتى التبادل المعلوماتى ما بين السى أى أيه و ما بين المجلس العسكرى معرفتش تحدد مين الطرف التالت تقوم أنت بكل بلاهة تسأل نعرفهم أزاى, يكفى انك تعرف أنهم اصحاب اجندة خارجية و ساعات داخلية و هما عبايات بكباسين على اللحم , سجاير انجو ملفوفة قدام مجلس الوزرا, ميدان التحرير, اصابع خفية و بلاش دماغك المريضة تقودك لافكار مش مظبوطة عن الاصابع الخفية لانها بتحمل معانى كتير
يعنى مفيش أسماء ؟
غبى ... غبى , أسماء إيه يا متخلف أنت أيش فهمك فى الشغل الاستخباراتى الحاجات دى لا يعلن عنها دلوقتى دى تشوفها عينك زى المجمع العلمى و هو مولع مثلا, زى المتحف المصرى و هو يتسرق ايام الثورة , زى محطة الضبعة النووية و هى بتحتل, كده يقى انت شوفت بعينك افاعيل الاصابع الخفية و تانى أوعى تفهم المعانى التانى القبيح من الكلمة دى!
طيب أزاى نحبط مخططهم؟
ده سؤال ذكى, حضرتك تقعد فى البيت تلبس الطرطور زمارتك فى ايديك تبص على المشير و هو بيخطب فى الأمة أو اى حد ينوب عنه و تصفق كويس عشان مصر خلاص عبرت المرحلة الانتقالية و داخلة طيران على الديموقراطية و تقفل التليفزيون و تنام و لو مصر قوى و عايز تنزل تاخد طرطورك و شماريخك و زمارتك و تحتفل شوية فى ميدان التحرير بدماء الشهداء و ان الضباط طلعوا راءة و مبارك لسه رئيس لمصر و لم يستقيل و هو لسه بيحكم زى ما اعترف بنفسه و اول ما تدق الساعة ستة تاخد بعضك و تروح و متنساش قبل ما تروح تقول الجيش هو اللى حمى الثورة الشعب و الجيش ايد واحدة
طيب و الاصابع الخفية حتكون فين؟
أحممم مع أنه سؤال محرج قوى بس أحنا عاملين حسابهم الكلاب بتاعتنا حتحصى من النوم الساعة ستة ان شاء الله عشان تنضف الميدان من الاصابع الخفية
كلاكيت تانى مرة
يعنى إيه طرف تالت؟
يعنى مجلس قيادة الثورة المضادة, يعنى اللى مش عايزين البلد تنضف يعنى اللى عايزينها تفضل منهوبة و مسروقة و فاسدة زى ما هى عشان هما منتفعين من الوضع ده, يعنى مش عايزين الناس تدور على حقوقهم و الا هما اول ناس تروح فى الرجلين يعنى لا يمكن يبيعوا حبايبهم فى طرة عشان دى عشرة عمر و بعدين دافنينوا سوا
مين هما بقى الطرف التالت؟
المجلس العسكرى هو الطرف التالت لانه متخصص فى اجهاض الثورة بشتى الطرق سواء فى سير المحاكمات المتباطىء اللى بينذر ببراءة لجميع المتهمين و بانت بشايرها فى قضايا قتل المتظاهرين و المتهمين فيها ضباط و كمان عدم ارسالهم الى الان لاى خطابات تطالب الدول الاورية باسترجاع الاموال المنهوبة , يعنى اعتقال الثوار عمال على بطال و قتلهم و سحلهم و عمل عاهات مستديمة بيهم
طيب نعرف الطرف التالت أزاى؟
سهل قوى أنك تعرفهم كل القيادات الامنية العليا فى جهاز الشرطة , الأمن الوطنى بكل قياداته و العاملين فيه, فلول النظام , المجلس العسكرى , الشرطة العسكرية
يعنى مفيش أسماء ؟
عندك اسماء كل اعضاء المجلس العسكرى و اسماء وزارء حكومة الجنزورى و كل الفلول اللى نجحوا فى انتخابات مجلس الشعب و اللى قاعدين فى طرة حاليا و اللى لسه فى مناصهم فى كل قطاعات الدولة الخدمية و المصانع و الشركات المملوكة للدولة
طيب أزاى نحبط مخططهم؟
أن أحنا ننزل يوم 25 يناير اللى جاى و نطالب باسقاط حكم العسكر عن طريق التسريع انتخابات الرئاسة ليكون لدينا رئيس منتخب فى حد اقصى 15 مارس اللى جاى يمارس سلطاته وفق الاعلان الدستورى و يشكل حكومة انقاذ وطنى بالتوافق مع البرلمان او تعيين رئيس مجلس الشعب القادم رئيسا مؤقتا للجمهورية يمارس سلطاته وفق الاعلان الدستورى و يشكل حكومة انقاذ وطنى بالتوافق مع البرلمان
طيب و الاصابع الخفية حتكون فين؟
الاصابع الخفية حتظهر فى حدود الساعة ستة مساءا عشان تحرق لها كام مبنى على ممارسة كام عمل بلطجى و دول باشراف و مباركة قيادة المجلس العسكرى عشان يبقى مبرر قوى لان الشرطة العسكرية تقتل و تسحل المتظاهرين فى ميدان التحرير
ليست هناك تعليقات:
إرسال تعليق