يعنى انا ممكن ارفع لك ضغط و اجيب لك السكر بشوية ارقام تحرق دمك و تطير عقلك, و ده لو رصيت قدامك شوية ارقام من البيان السنوى للجهاز المركزى للمحاسبات عن الحسابات الختامية للدولة و اللى يعنى اول القصيدة فيه كفر اساسا: ان الدين العام جاوز الحدود الآمنة, طبعا الافتتاحية دى نفسها كارثة تخليك لازم تعرف هو ايه الموضوع بالضبط و تبقى بتسال السؤال المعهود اللى كلنا بنسأله دلوقتى " هى البلد دى رايحة على فين؟" يعنى لو اخدنا على سبيل المثال الموازنة العامة للدولة عن سنة 2009/2010 تلاقى ان الفجوة ما بين الاستخدامات و الايرادات الفعلية وصلت الى 124,1 مليار جنية" شوفتم الكارثة اللى احنا فيها" و مش بس كده, الطبيعى ان كل ما الوقت بيمر الموضوع المفروض بيتحسن, الاوضاع بتتعدل, و لكن الكارثة ان ده مكنش بيحصل اساسا فالفارق فى الموازنة سنة 2004/2005 كان 61,4 مليار جنيه و بعدين قفز بقدرة قادر الى 89,9 مليار جنيه فى سنة 2008/2009, يعنى الفارق مش بيقل بل بيزداد فى كل سنة, بلاش نقول ان ده نتيجة للفساد و السرقة و النهب و الرشوى و الحرامية, خلينا نتكلم بس النهاردة بلغة الارقام باعتبار انها حكومة نظيفة عشان اللى كان ماسكها نظيف و نتحاسب على اساس الاداء الحكومى الاعجازى فى العجز و الاهمال و الاهدار اللى وصل بينا الى 124,1 مليار جنيه فى السنة المالية لسنة 2009/2010 و طبعا نتيجة للقرار الحكيم لضم صندوق التامين الاجتماعى لوزارة المالية, كان مديونية وزارة المالية لصندوقى التأمين الاجتماعى للعاملين بالقطاع العام و الخاص نحو 121,7 مليا جنيه فى 30/6/2010, "شوفتم الحلاوة اللى احنا فيها", بلاش نقول ان كل ده راح سرقة و نهب و استيلاء و نقول ان ده نتيجة لفشل الاداء الحكومى, طيب و لو عرفت ان وزارة المالية الرائعة بقيادة الاقتصادى الفذ يوسف بطرس غالى وصلت مديونيتها ايضا للهيئة المصرية العامة للبترول نحو 40,4 مليار جنيه فى 30/6/2010 و عشان بس احقاقا للحق اللى المفروض تخجل منه وزارة المالية حنقول ان هناك ارصدة دائنة مستحقة لوزارة المالية من طرف الهيئة بلغت نحو 871 مليون جنية فى 30 / 6/ 2010, يعنى ترمخة و تطبيخ و و وقاحة من الطرفين !!
و لو مسكنا المواطن المصرى البسيط الغلبان نلاقى التقرير بيقول بحقه ايه؟!, بيقول التقرير ان معدل الفقر اللى بينتموا الى خط الفقر الادنى وصل الى 16,232 مليون نسمة بنسبة 21,6 % على مستوى الجمهورية و بلغ متوسط نصيب الفرد السنوى من الناتج المحلى الاجمالى فى مصر نحو 2,77 ألف دولار, بالله عليكم ايه الرد و لا حتى التعليق على ارقام تحرق الدم و تجيب الضغط و ترفع السكر لدرجة انك تبقى كيس سكر من بتوع التموين مينفعش معاك و لا اتنين لتر انسولين !!
و طبعا التقرير بيضع مصر فى الترتيب رقم 114 ما بين 180 دولة طبقا للبيانات الواردة بتقرير صندوق انقد الدولى اكتوبر 2010 فى الفر و الذل و الخيبة و الهوان و تجويع شعبها !! و كمان بلغ عدد الاميين فى مصر طبقا للتعداد العام للسكان لعام 2006 اللى اعلنت نتائجه النهائية فى مايو 2008 ان 17 مليون نسمة بنسبة 29,6% من عدد المصرين اللى بتترواح اعمارهم ما بين 10 الى اكثر منهم ذكور اميون بنسبة 22,3% و اناث اميات بنسبة 37,3%" فعلا البلد بتتقدم و الاقتصاد مززه و كلنا متبشتكين و مدلعين على الاخر, النمو الاقتصادى ايه على ودنه يا جدع"
و اما بقى لو اتكلمنا على العشوائيات و حدث و لا حرج حتعرف ان عدد سكان المناطق العشوائية 12,2 مليون نسمة يمثل 16,8% من اجمالى التعداد العام للسكان و بلغ عدد المناطق العشوائية على مستوى الجمهورية 1221 منطقة و تم الانتهاء من تطوير 352 منطقة عشوائية فى 15 محافظة بنسبة 29,3% من اجمالى المناطق القابلة للتطوير و عددها 1201 منطقة ده غير ان صندوق تطوير المنطق العشوائية التابع لمجلس الوزارء حصر عدد 1068 منطقة غير مخططة منها 404 مناطق غير آمنة" ده مش بيفكرك طبعا بمنطقة المقطم فى الدويقة , اكيد افتكرت دلوقتى, اللى قالوا عليه ان الناس لما بتتزنق بتتبول تحت الجبل و تصرف حاجتها هناك عشان كده الجبل وقع عليهم, فعلا دى غلطة الناس امال ايه", طبعا مننساش ان الحكومة قامت بمجهودات فظيعة عشان تساعد رجال الاعمال انهم يعطوا صورة حلوة عن مصر و عملوا لينا مدن عالمية على ارض مصرية و يستفذونا ان مكنتش قادر تسكن فيها على الاقل افخر بانها موجودة فى بلدك و لا يتحرق دمك و لا تتنقط من اللى بتسمعه عن مدينة الرحاب و لا مدينتى و لا الشروق و لا اقطاعيات التجمع الاول و الخامس و لا مجمع عرابى الفاخر و لا الحتت اللى من باريس فى العبور و لا بورتو مارينا و لا بورتو عجوة و كل ده لان ده بيعطى صورة حلوة عن بلدك و معلش ايه يعنى لما اتناشر مليون يقعدوا قى الف و متين منطقة عشوائية ما يولوعوا بجاوز وسخ هما فاكرين نفسيهم بنى آدمين زى سكان المناطق دى و لا أيه!!
و فى مجال الصرف الصحى اسمع حكايات الف ليلة و ليلة تصعق منها و تتصدم ان الارقام و الكلام ده موجود فى مصر اساسا ام الدنيا "مش عارف هما يقصدوا انهو دنيا ام الدنيا الفقرانة الجعانة المهانة و لا انهو دنيا" و المرة دى و انت بتسمع حط احتياطى جنبك دوا الضغط و اتنين لتر جلوكوز عشان حالة الاغماء و دوا القلب و اللى الذى منه يعنى عشان تعرف تستقبل كلامى, عدد السكان المحرومين من خدمات الصرف الصحى على مستوى الجمهورية بلغ نحو 34,5 مليون نسمة و بلغ عدد القرى المحرومة من خدمات الصرف الصحى 3728 قرية تمثل نحو 79,8% من إجمالى القرى البالغ عددها 4671 قرية, دول بقى ناس بعيد عنك و عن السامعين عايشين كده على الفطرة يا مولاى كما كانت الحياة البدائية الاولى " الجمع و الالتقاط و التغوط فى العراء و هيصة " و دى مش نهاية الاحزان و المآسى للاسف ده لسه فى موضوع القرى مآسى بجد تبكى لو عرفت ان بلغ عدد العزب و الكفور و النجوع المحرومة من خدمات الصرف الصحى اللى عددها 28231 تمثل نحو 99,5% من إجمالى العزب و الكفور و النجوع البالغ عددها 28372, "النسبة دى بتفكرنى انا على نحو شخصى باستفتاءات التجديد لمبارك فى كل ولايته السابقة"
احرق دمك اكتر و اخلى النار تجرى فى عروقك بدل من الدم , اسمع دى بقى و ادعى على اللى كانوا السبب بس بقلب و بحرقة و انت ساجد عشان الدعاء يستجاب الله يكرمك, تعرف ان الطعام و الشراب ارتفع بنسبة 19,6% و لو بقى قمنا بتفنيطة بسيطة لنوعية الطعام و الشراب ده خد عندك الاتى:
الخضروات ارتفعت بنسبة 62,5% و الفاكهة بنسبة 38,8% و اللحوم بنسبة 18,3% و السكر و الاغذية السكرية بنسبة 17,6% و الالبان و الجبن و البيض بنسبة 6,3% و اما بقى الاسماك و المأكولات البحرية بنسبة 6,1%, ايه رايك اتحرق دمك بما يكفى و لا لسهو الله انا نفسى فعلا ما اقولش اكتر من كده عشان ما لاقيش حد من اللى بيقرى المقالات يطب ساكت بذبحة صدرية بس الغل اللى فى مخى و قلبى و عضلات وشى و صوابع ايدى اللى بتكتب مش سامحة ليا ان اوقف لما اقولك بقى المفاجاة الكبرى و هو ان الدين العام الداخلى بلغ صافى رصيد الدين العام الداخلى فى 30/6/ 2010 " 888,7 " مليار جنيه بنسبة 73,6% من الناتج المحلى الاجمالى !!!
و بلغ نصيبك يا حلو بقى من الدين اللى المفروض تقوم زى الشاطر تدفعه عشان الديانة حيكسروا عليك الباب و يقولوا لخمسة و تمانين مليون مصرى هات الدين اللى عليك اللى انت مصرفتش فيه قرش واحد على البومب و المراجيح كام؟!!, نصيبك الصافى من الدين بدون مقاطعة 9192,9 جنيه عام 2008/2009 و فى عام 2009/2010 عشان الحكومة بتحبك و واثقة ان فى ضهرها راجل حيسد عنها و قدها و قدود رفعت لك الدين الصافى اللى على كل راس فى مصر الى 11426 جنيه, يعنى روح ادفن نفسك لانك لما تبص لمراتك و نفسك و قورتة العيال اللى معاك و الديون اللى عليك بقى اللى هى شوية هبل الفين هنا و الف هناك و خمسمية جنيه لحمادة و متين جنيه لحمدى و 60 جنيه للبان غير الجمعيات اللى مدبس فيها عشان تدفع الدروس الخصوصية او تعمل عمرة للسقف اللى وقع عليك وبين عورتك قدام الناس الحسبة بسيطة تروح تشترى جروف بمية جنيه و تحفر كده فى الصحرا و تترحم على نفسك و تنزل فى الحفرة و عشان تقلل التكاليف متجيبش حد يردم عليك هى حتتردم عليك لوحديها من الهم و القهر!!
و عشان الحكومة و مبارك و عياله الحلوين اللى سرقوك و نهبوك و مش بس سرقوا فلوس البلد و لكن حبوا يعملوك مفاجأة العيد و هى دين على كل راس مصرية من زعيم الشعب الله لا يسامحه لشعبه البيبى الطيب خلى صافى رصيد الدين العام الداخلى و الخارجى 1080,2 مليار جنيه بنسبة 89,5% ن الناتج المحلى الاجمالى !!!!!!!!!!
مش حكمل حرقة دم اكتر من كده فى جزئية الديون اللى وقعت على راسك و على راسى الله لا يسامحهم و يكون حسابهم عسير دنيا و اخرة, تعالى بقى لجو الامراض و الاؤبئة اللى زعيمنا حبيبنا جعلها هبة سنوية و شهرية و يومية لكل شعبه حبيبه حيث ان بلغ عدد المصريين المصابين بفيروس C النشط حسب تحليل R.N.A نحو 7,5 مليون مواطن بنسبة 9,8% على مستوى الجمهورية طبقا للمسح الشامل الذى قامت به وزارة الصحة و اعلنت نتائجه فى ابريل 2009 و طبعا قائمة الامراض تطول و لا تنتهى من اعداد المصابين بمرض السكرى و ضغط الدم و السرطان و الفشل الكلوى و غيره و غيره كتير قوى عشان يوسف والى كان عايز يختبر مدى قدرة المصرى على التعايش مع اشد الامراض فتكا او ربما يكون الراجل كان قصده خير و هو التقليل من الكثافة السكانية اللى موجودة فى مصر و يمكن لما يموتوا شوية حلوين الوضع ينتعش شوية و البلد تخف من زحمتها و اللى كان طالع عين اللى جابوه فى حياته يموت و يرتاح و يستنى بقى جنة الخلد او قبر ضيق يكون له اكرم الف مرة من العيشة اللى كلها حرقة دم و خراب ديار و ربنا يستر محدش يطب ساكت النهاردة من الكلام اللى نشرته و لاصحاب القلوب الضعيفة بلاش تقروا المقال و لو ان النصيحة جت متأخر و فى أخر المقال كنوع من الخبث منى
ليست هناك تعليقات:
إرسال تعليق