يوم 15/5/2011
من منا يعيش بلا أمل ... أظن أنه لايوجد أحد علي وجه البسيطة يعيش بدون أمل ... فالأمل هو الذي يعطي للحياة طعم ولون ورائحة أيضا .
فالفقير لديه أمل أن يفك الله ضيقته ... وينزل عليه ربه من بركاته لينعم ببعض الخير ويعيش ولو مستورا في بيت كبير بعيد عن الكوخ أو مركب الصيد الذي يعيش فيه هو وعائلته !!!البيت الكبير الذي يأمله الفقير أوضه وصاله وعفشة ميه ومطبخ ... ده أقل أمل يتمناه !!! لكن الأمل الأكبر عنده أنه يربي أولاده كويس ..و يوديهم مدارس ويعلمهم كويس ويلبسهم كويس ... ويأكلهم كويس ... ويخليهم مايحتاجوش لحد ... ولما يخلصوا دراستهم أمله أانهم يتعينوا ويتوظفوا أو يمسكوا شغله ويبقوا محترمين ويتجوزوا ويستروا أخواتهم البنات .
ده حلم الفقراء أما الاغنياء فأملهم أن البورصه تكسب والشركات تربح والفائدة علي الفلوس في البنك تعلي !!! والأرباح تزيد وتزيد ... ومايدفعش ضرائب ... ومايدفعش مرتبات وينصب علي البنوك في كذا مليون !!!
الأغنياء ولادهم مالهومش نصيب من أمال آباءهم الأغنياء ... عشان كده ..تلاقي معظم ولاد الأغنياء حتي لو كانوا ناجحين في شغلهم ... ألا أنهم سطحيين التفكير ... ومتروشنين .. وفي الدسكو نايمين قايمين ... لأن بابا اللي بيديلهم من غير حساب وهما بطبيعتهم مسرفين !!!
أنا في مقالي ده مش بفند الأمل في نظر الغني والفقير ... لا ... أنا بوريكم الفرق بين أمل وأمل ... وبين حالة وحالة ...!!! طيب لو سبنا موضوع الغني والفقير ... وسألنا شباب ثورة التحرير أيه هوه منتهي أملك ... معدش زي الأول يقولك علاوه أو ترقية ... لكن هيقولك أملي أني ألاقي تغيير...!!! تستغرب وتقوله تغيير في لأيه !!! هيبصلك من فوق لتحت ويقولك ...تغيير كل حاجه ... تغيير الحال والأحوال ... تغيير الريس والمرؤوس ... تغيير الأنظمة مش بس نظام !!!
تقوله معلهش قولي أملك أن يتغير إيه بالضبط ..؟ يرد عليك ويقولك أنا أملي أن البلد نظامها كله يتغير من تحت لفوق من عسكري المرور لرئيس الدولة ...عايزين نحس بالتغيير ...!! بصيت له وقلت الله أملك أن التغيير يعم البلد كلها من فوق لتحت ... طيب مش تبدأ بنفسك الأول !!
قلت له .. لما تقوم بدورك صح وتعمل اللي عليك وتبطل مظاهرات واعتصامات وجمع ... يبقي نتغير ... لكن طول ما أنت واقف معتصم أو متظاهر ومعطل الحياة و واقف عجلة التنمية هيتغير النظام أزاي !!! طول ما أنت ماشي عكس الأتجاه ... ومخك وتفكيرك عكس الأتجاه ... ونايم في البيت أو معتصم في الشارع وما بتشتغلش وما بتنتجش تبقي عايزنا نتغير أزاي ؟!
أعطينا الدليل وأبدأ بنفسك, حاول تغير نفسك وخلي أملك في التغيير يبدأ من ذاتك ... ومن أفعالك ... ومن أراءك ... ومن نشاطاتك ... لو أنت اتغيرت ... أظن أننا كلنا هنتغير ... والدولة كمان هتتغير ويكبر الأمل وينمو ويكون الأمل في الريادة هو أمل كل مصري ...
لذا صديقي القارئ لمقالي ... أوعدني أنك تتغير وتخلي أملك أن التغيير يبدأ منك أنت ... وأن شاء الله هتلاقي كل شئ أتغير للأحسن يا أبن مصر !!!
ليست هناك تعليقات:
إرسال تعليق