ناويين 25 يناير اللى جاى كلنا نعزم نفسينا على ميدان التحرير عشان نحتفل بمرور سنة على الثورة و نتكلم عن أنجازات الثورة الخطيرة و مننساش نجيب معانا أعلام مصر و ملصقات بحبك قوى يا مصر, و نأكد على أن المسلم و المسيحى أيد واحدة و لا يمكن الاحتفالية طبعا تعدى من غير ما نقول الشعب و الشرطة و الجيش أيد واحدة و نسبح بفضل المجلس العسكرى اللى مرضاش يضرب نار على المتظاهرين و أهم حاجة نقولها أن الجيش هو اللى حمى الثورة!!!
خلاص كل واحد عرف حيعمل إيه و عرف دوره كويس, يا مسهل الحال يا رب.
خلاص اتفقنا, الموضوع مش ناقص الناس المندسة اللى زى أنا يشعللوا الدنيا و يخربوها عشان المظاهرات دى هى اللى جابت البلد ورا و عايزة تسقط هيبة الدولة و تنول أعدائها منها, فاللى زى بقى يا ريت يقعدوا فى البيت اليومين دول عشان خاطر حبيبتى مصر و استقرار مصر.
متنسوش و أنتوا رايحين أن فيه شوية حاجات فوق بعضيها مهمة قوى:
1- قلة مندسة
2- أصابع خفية
3- طرف ثالث
و عشان تفتكر و متنساش قبل ما تنزل أفتح التليفزيون المصرى عشان يحذرك من حركات مشبوهة و منظمات مجتمع مدنى خبيثة بتمول من الخارج عشان تخرب المظاهرات و تعمل احتكاك ما بين الجيش و الشعب, و خليك مشحون قوى بالكراهية اتجاه الأفراد دول عشان دول عملاء و خونة و عايزين البلد تخرب: يعنى شباب 6 أبريل - شباب ائتلاف الثورة - و أى حد يقول على نفسه ثورى أو عايز يحقق مطالب الثورة كل دول خونة ... .... أعيد تانى
و المخطط الجهنمى اللى حتسمعوه من الأشاوس المتنبئة اللى حتطلع على كام قناة فضائية فلولية مش حقول أنها المحور أو حتى السى بى سى أو التليفزيون المصرى, أن فيه مؤامرات خطيرة بتنسج حوالين مصر عشان تسقط عظمة الدولة المصرية لأن الأمريكان قلقانين جدا من أسلحتنا النووية اللى فى بدروم سرى بشبرا و كمان قلقانين من الأسلحة الكيماوية اللى فى عزبة القلعة, و برضه عايزين يطلعوا مصر من المنافسة فى السوق العالمى لأن المنتجات المصرية زى ما أنتوا عارفين غزت كل الأسواق العالمية و وقفت حال البضاعة الغربى و اللى أهم من كل ده أن أحنا حنحتل إسرائيل بعد العشا لما نخلص احتفال بذكرى 25 يناير.
كل الإمكانيات الجبارة دى لازم تخلى دولة زى أمريكا تحقد علينا و تحسدنا طبعا و تحاول تبوظ اليوم ده و تخلى الجيش يحتك بالشعب عشان يحرمونا من عظمتنا و تفوقنا الحربى و الصناعى المهول!!!
و إسرائيل و أمريكا و الغرب لا يمكن يدخل عليها حكاية 45 % أمية و لا 40% تحت خط الفقر و لا تفشى لأوبئة البلهارسيا فى الأرياف أو التهاب الكبد الوبائى أو الفشل الكلوى أو مرض السرطان لأن كل ده تكتيك و تمويه عشان منظهرش قدراتنا قدام العدو اللى واقف صفا على الحدود المصرية من كل الاتجاهات مستنى اللحظة اللى حيسقط فيها 19 عضو من المجلس العسكرى مما سيؤدى بالضرورة لأنهيار الجيش كله عشان يدخلوا مصر و يسرقوا خياراتها!!
يا ولاد اللذينة يا أمريكان أنتوا فعلا لعبينها صح
هو ده التكتيك الجهنمى و المؤامرة الخارجية ليوم 25 يناير يا أخوانا أزاى ما اخدناش بالنا من المؤامرة الفظيعة دى و بعدين مش واخدين بالكم أن الكشاكيل ملت البلد فجأة و الاجندات الحمرا كمان لدرجة أن طارق علام الخبيث عمل فيلم الأجندة الحمرا يبقى هو كمان متآمر, كده خيوط اللعبة كلها انكشفت !!
فعلا يبقى أمريكا بتتآمر علينا و فى نفس الوقت بتدى مليار و نص دولار مساعدة عسكرية للجيش المصرى, الموضوع فيه أن و الأنا أن دى دولارات مزيفة و جهاز الأمن الوطنى أو أمن الدولة كشف الملعوب,و قدر يعرف أنها مطبوعة على برينتر أتش بى ألوان!!
كده اكتملت نظرية المؤامرة من كل جوانبها
خلاص اتفرجت على التليفزيون المصرى و قنوات الفلول و اتشحنت, تمام قوى يبقى أنت عارف أن كل العيال اللى بتقول على نفسها أنها جاية تحقق أهداف الثورة دى عيال خونة عميلة.
حننزل نحتفل لحد الساعة خمسة أو ستة و بعدين نسحب نفسينا و نمشى على طول عشان الشرطة العسكرية ظابطة المنبه على الساعة ستة تصحى من النوم عشان تسيح دم العيال الخونة.
طبعا البلطجية و القلة المندسة و الأصابع الخفية كائنات ليلية بتصحى الساعة ستة برضه و تنزل ميدان التحرير و تحاول تحتك مع عساكر الجيش الغلابة اللى حيكونوا فى شوارع محيطة بميدان التحرير و ترمى عليهم قنابل مولوتوف و شوية حجارة فيرد الجيش بطلقات صوت و اوعى تفكيرك يخونك و تقول دول بيضربوا رصاص حى و خرطوش لأن الجيش لو استخدم اسلحته كانت حتبقى مجزرة حقيقية, أمال مين اللى بيضرب رصاص على المتظاهرين؟1
بجد أنا زهقت من أصحاب العقول التخينة اللى زيك, يا عم القلة
المندسة و الأصابع الخفية, فهمت بقى, متقلقش المجلس العسكرى بعد المذبحة اللى حتحصل حيعمل مؤتمر صحفى و يوضح أن اللى عملت كده أصابع خفية عايزة تورط مصر فى فوضى تامة و إسقاط هيبة الدولة و إفشال الثورة و التحول الديموقراطى و طبعا أنت مينفعش تعرف أسماء الأصابع الخفية دى لأن ده أمن قومى و برضه المجلس العسكرى حيوعدك بأنه حيعمل لجنة تقصى حقائق مستقلة عشان تقبض على المتهمين و مش حتتوصل للأصابع الخفية عشان هى يا زكى أخواتك خفية بس حيعرفوا يقبضوا على اللى عملوا الشغب و دول حيكون عددهم تقريبا 200 مشاغب تهمتهم أنهم بيرحضوا على استخدام العنف مع الجيش و كمل...
شاطر
إتلاف ممتلكات عامة و خاصة
و قلب نظام الحكم
نظام الحكم !!
اى نظام حكم؟!!!
هو مش احنا قلبناه و دلوقتى أحنا فى مرحلة انتقالية
ما علينا من الأسئلة اللى تفقع المرارة دى أحنا عايزين استقرار و أنت عيل ثورجى عايز تخربها, أسكت الله يكرمك
عامة منظمات المجتمع المدنى و الحركات الثورية و الأحزاب حتشجب و حتندد بتعامل الشرطة العسكرية الوحشى مع المتظاهرين اللى حيعتصموا بعد الساعة ستة و حيترحموا على الشهداء اللى ماتوا فى الأحداث الأخيرة المؤسفة و بعض المحللين و السياسين و المسمعاتية يطلعوا على قنوات الفضائيات ينددوا بسياسة العنف اللى بتستخدمها المجلس العسكرى و أن الحل السياسى أفضل و المجلس العسكرى يعمل مؤتمر يظهر فيه اعترافات بعض الخونة العملاء و بعدين عيال الفيس بوك يجيبوا نفس الاشخاص فى فيديوهات تانية تبين أنهم تم إجبارهم من قبل المجلس العسكرى على الاعتراف بالأكاذيب دى و هكذا دواليك.
و بعدين ننشغل بدورات مجلس الشعب و الصراع على معايير تكوين اللجنة التأسيسية لعمل الدستور بين الليبرالين و الإسلامين فى صراع لطيف دمه ظريف و تنابذ بالألقاب و التخوين و التفسيق و ألخ ألخ و يفضل نفس الخناق ما بين اللجان الإليكترونية على الفيس بوك و ما بين العيال الفيس بوكية الله يخرب بيتهم اللى عايزين يولعوا الدنيا و الله يخرب بيت شباب 6 أبريل على شباب ائتلاف الثورة على اللى اليوم اللى ظهروا فيه
أما الاخوان على صفحة الحزب هو و النور و باقى الاحزاب الحلمنتيشى حيطلعوا إدانه لطيفة ظريفة و تأسف شديد و بالغ على و سقوط ضحايا و قتلى و تحذير الجيش من الاستخدام المفرط للقوة فى فض المعتصمين لان الاعتصام و التظاهر السلمى حق مكفول لكل مواطن, الله تصريح لذيذ قوى بيتباع بكام؟!
و المجلس القومى لرعاية أسر الشهداء و مصابى الثورة حيضم تواريخ جديدة لشهداء جدد و مصابين جدد و يجوا يقدموا فى 11 فبراير على أن تصرف لهم الإعانة فى آخر فبراير
و عادى يعنى يا أخوانا إيه بقى اللى حصل و لا حاجة
مبارك مش حيتحاكم و الجلسة تؤجل لتاريخ كذا و كذا لحين الاستماع لشعبولا
و القناصة بتوع الداخلية اللى قنصوا الشهداء مش عارفين يجيبوهم
و الأمن الوطنى هو أمن الدولة بس نيو لوك و بيمارس نفس مهامه القذرة
و الضباط اللى قتلوا المتظاهرين عند الأقسام براءة , و الاحكام اللى منتظرينها بفارغ الصبر على رموز النظام السابق مفيهاش جديد و استثماراتهم كلها زى الفل و فى زيادة مستمرة
و جيمى شايل المصحف و علاء شايل الكرسى البلاستيك الاحمريكا
و مبارك بيدلع فى المركز الطبى العالمى
و عادى و الله
اللى ينتقد المجلس العسكرى يبقى بيسقط آخر مؤسسة بقاية لينا فى مصر
يبقى عايز مصر .......
أنتوا عارفين الباقى
و أنا اللى زى ناس بق بيتكلموا و خلاص و لا فيه أى حاجة من ورا كلامه غير أشعال الفتن
بس حقولكم حاجة أخيرة متضحكش أصلا, قالوا نفس الكلام ده لما أصر جزء كبير من المصريين أن مبارك يمشى بعد خطابه الثانى المثير للشفقة و لما مشى كله رفع أيده و حمد ربنا على أن الظالم غار فى ستين داهية
و ربنا يبارك فى شباب مصر
اللى كان من كام يوم شباب بلطجى
و مأجور و عايز يخرب البلد
و ده مخطط خارجى و مؤامرة أمريكية إسرائيلية
لإسقاط هيبة الدولة
سبحان الله بجد على الناس اللى بيتحولوا بسرعة خرافية و رأيهم دايمن مع مع ضد ضد
ليست هناك تعليقات:
إرسال تعليق