3_7_2011
أخيرا وليس آخرا قد انتهت حلقات رعب مسلسل الثانوية العامه التي تضعها لجنه الامتحانات كل عام لتسبب الفزع والذعر لنا جميعا واستراح الاباء والامهات من معاناتهم الطويله طول العام من حيث فلوس الدروس والقلق والضغط النفسي ومن الهم ووجع الدماغ ووجع القلب . لأ نهم بصراحه بعد السنة المشئومة دي 2011 ماكانوش ناقصين امتحانات الثانوية العامة كمان ومستقبل العيال كان كده كده ضايع لانهم في الاخر لا هيلاقوا شغل ولا يحزنون . كانوا الاول قبل الثورة خايفين الا الاولاد يدخلوا جامعات خاصه ولا معاهد بالفلوس لان المجاميع كانت بتزيد وتعلي زي الاسعار كده ماكانت بتزيد و بتعلي وأ عداد القبول بالجامعات كان بيقل بشكل مفزع وخصوصا بقي في كليات القمة يعني كده كده خسرانة وكل ده كان علشان حسحس وابنه المصون جمال كانوا سايبين البطالة تنتشر في البلد وهما بقي يبقوا استفادوا من خصخصة الجامعات وياخدوا الفلوس في جيبهم .
المهم .... مش هنعيدوه تاني بقي .......
بس حتي السنة دي بعد الثورة قولنا بقي هيرحمونا ويرحموا الاولاد الغلابه والاهالي بعد اللي شافوه في ميدان التحرير لكن ازاي ودي تيجي برضه وازاي نفوت الحلقات المرعبة... دي ثانوية عامة يعني مش هزار ويعني لازم العيال يترعبولهم شويتين برضه ميضرش....
جابولهم في امتحان الانجليزي يكتبوا فقرة عن تأثير الفيس بوك في الثورة المصرية وفي العربي يكتبوا برقيه لرجال الشرطه وكمان موضوع عن الاحداث في مصر واية بقي ده للصف الثاني الثانوي اما بقي في امتحان الجيولوجيا فجاء السؤال اللي هو وكان عن الاثار الضارة للقنابل المسيلة للدموع .
ياه اخيرا التعليم اتطور وبقي بنستخدمه وبنلاقيه في حياتنا اليومية يااااااااااااه ده الدنيا اتغيرت
دول حتي ما استنوش لحد ما العيال تهدي شوية ... مستعجلين علي أيه ؟؟ ما هم خلاص عرفوا الحاجات دي لأ و كمان شافوها بنفسهم يعني حاجة بصراحة ........... يالا
المهم وبعد كل ده ياعيني الاهالي مستنيين نتيجة الثانوية العامة وخايفين كمان منها......... أظن بقي المفروض تنتهي حلقات الرعب والفزع دي كلها لان بعد تعديل وتطوير التعليم وارتفاع الاجور واعطاء كل ذي حق حقه المدرسين هيشرحوا بضمير والطلاب مش هيخافوا ميدخلوش كليات كويسة علشان يلاقوا شغل ولا هيخافوا من الجامعات الخاصة ونخلص بقي كفايانا ثلاثون عام رعب وشلل .... وخلي بقي الناس يعيشوا الصيف بهدوء وراحة بال ......
وبالتوفيق لكل طلاب الثانوية العامة اللي كنت زيهم في يوم من الايام عانيت الامرين وشفت المهاذل بنفسي ............
و آه ياعيني علينا ياشعب مصر .
ليست هناك تعليقات:
إرسال تعليق