رايح له قبل الميعاد -- بفرحة غامرة وسبقانى
شايل له ورد الوداد ----- والقلب مليان امانى
والحنين اللى ذاد --- جنحات طايرة وشيلانى
ابو طله بهجة اعياد اشواق احضانه موعدانى
------------------------------------------
اهو جه لا مش هو --------- ياترى اتاخر ليه
ياترى قاصد وللا --------- تاخيره مش باديه
كله ياظنونى الا ----------- نار الحيرة عليه
------------------------------------------
استنيت وميعادنا فات --- واتبدلت كل الحجات
الاغانى راحت اهات - والثوانى طالت ساعات
وجدى يصرخ سكات -- مش لاقى معنى حياته
وقلبى اللى بفرحه بات ---- يرقص معى دقاته
تاه فى ظنون متاهات ---- وتاهت منه نبضاته
-----------------------------------------
رجعت من نفس الشارع رجل تجر فى الثانية
لا انا شايف ولا سامع - ولا انا حاسس بالدنيا
ظلمة والنور والع ---- وكانى فى سكة ثانية
وجودى منى ضايع ----- فى دنيا غير الدنيا
-----------------------------------------
وفى رغرغة عنيا ------- لقيته بيجرى عليا
همساته عطف وحنية -- ونظراته اشواق ليا
قالى متزعلش ياعنيا - تاخيرى ماكنش باديا
--------------------------------------------
اتلاقينا بادينا وضلوعنا - ونسينا ايه اللى وجعنا
شفايفنا مسحت دموعنا مشاعرنا لمست اطماعنا
فى سحر لقانا اتجمعنا ----- احنا وامانينا ودلعنا
الحب مركبنا ومتاعنا --- والفرحة متعتها تمتعنا
الموج غنى اشعارنا - والقمر لالى على شراعنا
وغنينا هنانا وبدعنا ---- وفين الدنيا اللى تسيعنا
وسبنا لاشواقنا الدفة -- وغرامنا نسيم مطاوعنا
يتماوج يمرجحنا بخفة --- برقة ينزلنا ويطلعنا
قلوبنا باحضاننا تدفى ---- وغزل عينينا يولعنا
لا نار لقانا بتطفى ------- ولا حلاوتها بتشبعنا
ليست هناك تعليقات:
إرسال تعليق