مقالات أدبية: الخلطة السحرية بقلم/ محمد علاء الطوخي

في البداية المقال إهداء بسيط إلي الأسطورة 

خلطتنا النهاردة مش خلطة اكلة لا ولا خلطة ناس مع بعضها لا برضو الخلطة النهاردة , خلطة داخلية بين نفسك وانت ازاي تقدر توصل بنفسك الي مرحلة من الخلطبيتة اللي تخليك ماشي علي الطريق السليم والصح.

الموضوع مش سهل ومش بسيط بس برضو مش مستحيل (كلمة بتاعت اي حد دلوقتي مش عارف يعمل حاجة)

بس إن شاء الله هنقدر ان الاوان بقي عشان نهدم الفكرة دي

فكرة انا نفسي عايزة ايه بالضبط؟

ازاي افكر؟

ازاي احكم بالعين ولا القلب ولا العقل (ها) ؟

ازاي اعمل خليط نفسي ومع نفسي في السكرتة من غير ما حد يلاحظ ؟

ما تيجي نعترف كلنا مجانين اه كلنا مجانين طول اليوم شايفين نفسنا يا اما مخنوئين يا اما كويسين يا اما محدش حاسس بيك يا اما مظلوم يا اما احسن ناس (سوهاج)

*اما بقي لو ابتدينا النفس عايزة ايه بالظبط ؟ 

والله يا جدعان محدش مرتاح خلينا نعترف ان الراحة دي في الجنة ان شاء الله قولي ليه ؟ ها ما تقول ؟

انا هقولك ليه ؟

الواحد مننا من صغره يقول نفسي اكبر يكبر يقول يارتني صغير , نفسي اجيب اللعبة دي جبتها اتخنقت اوووف بقي (ملل), كبرت عايز اشتغل اشتغلت يا ربي مشاكل الدنيا وقلنا وقالووووا والواد والبتاع والجمعيات والمرتبات والظلم وعاااااااااااااااااااااااا 

عايز استقر يعني ايه يا برنس تتجوز يعني (يا خراشي) خور عندك (خد) بيئة بقي 

جمعيات – تجهيزات – اه شقات (نفس الوزن) – تختار بنت الحلالات – هدايات خور عندك (عيد ام – اب – مولد – ميلاد – صغير (كحك) – كبير(خروف) – شم النسيم – تحرير سيناء (معرفش ليه)

وهكذا ........

بس برضو الحلال مفيش احسن منه يا جدعان هو الواحد يطول يلاقي شريكة حياته برضك

فا برضو مش عارفين نفسنا عايزة ايه ؟

فلوس – مناصب – جاه (ياااااااااااااااااه قديمة اوي يا عم علي الكسار) – سلطان (هي طلبت معايا بقي)

ايييييييييييييييه سؤال الملايين ومحدش يعرف اللي يعرف يقول ميتكسفش

في بقي اللي هيجيب من الاخر ...انا نفسي نفسي نفسي نفسي ربنا يرضي عني

مش هتكلم في الدين والسياسة 

بس كل اللي هقوله يارب بجد يرضي عننا ويهدي نفسنا للطريق الصحيح

*ازاي افكر ؟؟؟؟

ما تفكر مظبوط انت هتحور شوف انت تقدر تعمل ايه واعمله واللي مش تقدر رتب اهميته اه ولا لا 

ومن الكبير للصغير الحوار هيخلص مش محتاجة فكاكة واوميجا وبتاع لا خاليص

بس بالله ركبها صح دماغك يعني خليها يمين (ربنا يجعلنا منهم) عايزين نخلص بقي 

*ازاي احكم بالعين ولا القلب ولا العقل (ها) ؟؟؟؟

والله يا جماعة حصل نقاش طويل عريض بيني وبين الاسطورة علي الحوار ده انا بقول القلب وهو يقول عليا النعمة من نعمة ربي العقل طب فكر يا جدع لا هو كده العقل طب يهديك يرضيك ابدا هو العقل

فا بعد ما فكرت انا رأيي تحكم وتفكر ب( عقبيون)

العقل مجتمع مع القلب معاهم العين (عشان متزعلش برضك)

ليه بقي (صلو علي النبي )

العقل طبعا برنس عايز حقائق ومعطيات وقلم وورقة واحد زائد واحد ولا لا لا لا اكتر من اه (يا كاظم ) صعب يضحك عليه ليه العقل زينة (يعني قوية) وده اللي بيميزك عن الحيوان (اسطورة) اه والمختل

طب ايه القلب طلع برا الحسبة لا يا جرع (جدع بيئة بقي )

ده القلب ده الكريم شانتيه بتاع الليلة ياااااااااااااااه هههههههههههاااااااححححححححح (احمد موسي) القلب هو مصدر كل البلاوي وماسمي القلب قلبه الا عشان بيتقلب اه بيتقلب وياسلام بقي عند الطيبين اللي احنا كلنا منهم طبعا طبعا (غرور النفس ) كلنا بنتقلب اه وبيضحك علينا حتي الناصح برضو قلبه بيتقلب لازم يتقلب عشان الانسان فطرته الطيبة حتي ولو كان قتال قتلة (اونكل عباس اونكل عباس رشدي اباظة لما كان خاطف البت الصغيرة ونجوي فؤاد كانت بتحن عليها )

اما العين دي بتحب الحلو اوي والوحش لا (عشان متزعلش يلا يا ستي )

الخلاصة (حكم ) عقلك وقلبك وعينك مش بنسب لا اوعي تخليها نسب خليها كده رباني حكمهم كلهم والله هترتاح هتلاقي قلبك بيكسب مرة هتلاقي عقلك بيكسب مرة هتلاقي عينك بتكسب مرة (يلا يا ستي)

مفيش حد صح مفيش حد غلط لاتسيب الحبل علي البحري ولا تشده جامد خليها ماشي موجة 

*ازاي اعمل خليط ؟؟؟؟

التشكيل.... قلبك عقلك روحك ذكرياتك اوهامك خيالك احلامك زعلك فرحك جنونك هيبرتك كله كله 

اضربه في خلاط انت عايش ليه عايش 70 80 90 سنة احرص انهم يكونو بنسبة كبيرة صح ارجو كده

خليطك غير خليطي غير خليطه غير خليطها

فاحرص ان تنتقي خليطك مع خليها او خليطك مع خليطه عشان نعيش بقي في الدنيا