كلمة شهر أبريل
بعيدا عن دولة بلاليص ستان التي كنا نعيش في خِضم أيامها نحن (الأطباء البيطريين) إلى أن سيطرت أفكار التغيير (من قادة البلاليص) حتى وصلنا إلى مفترق الطرق التي أدت بنا – بعد المقابلة الشهيرة للسيد الرئيس ومن بعده قنديل باشا الله يكرمه ويشغله كمان وكمان – إلى أن تحولنا إلى شعب بغالستان (وكلمة ستان تعني إقليم باللغة الأفغانية)
ونظرا لحدة الموضوع أنصح اللي قرأ المقدمة ولم تعجبه ... ما يكملش أحسن !!!
أحب في بداية كلامي أثير تساؤل سألته طبيه زميله إمبارح .. "بدلا من البكاء على اللبن المسكوب .. هو إيه الحل ؟!"
وبعيدا عن أن الدكتورة سألت السؤال وما فيش حد رد عليها وبالتالي حولت إتجاهها إلى معرفة التكليف هيبقى بالأقدمية ولا بالتعين ولا بمسابقة .. ماعلينا
ونظرا لأننا خريجوا أو خريجي (مش فارقة كثير) كلية علمية و (عملية بس الكلام ده خليه في سرك ما تقولهوش لحد) فأنا (العبد الفقير إلى الله وأعوذ بالله من كلمة أنا) شايف أننا نحاول تحليل الموقف بشئ علمي.
فمثلا على سبيل المحاولة .. نشوف إيه هي المشاكل اللي واقع فيها الطب البيطري في مصر، وده علشان نعرف نناقشها ونحلها. وعلشان نحلها لازم نفهمها و نقف قدام المشاكل دي ونواجه اللي له مصلحة في بقاء الحال كما هو عليه.
ولأننا بنفكر بأسلوب علمي بحت فكان فيه واحد الله يرحمه إسمه (باريتو)، الراجل ده كان بيقول إيه (بيقول أن 80% من المشكلات يكون سببها 20% ، فإذا ما تمكنت من حل تلك ال(20%) ستستطيع حل الباقي متمثلا في (80%) ) ما حدش فاهم حاجه .. ما علينا.
من الآخر كدا أنا عاوز أوصل للي ليه مصلحة في بقاء الحال على ما هو عليه بالنسبة للطب البيطري في مصر
وهم كالآتي واللي عنده تصور تاني يقول يمكن نتستفيد:
1- وزير الزراعة المبجل الذي قال في لقاء للسادة المبجلين أعضاء نقابتنا المبجلة (إنتم لو خرجتم من الوزارة هبقى أنا وزير على مين .. شوية فلاحين).
2- أصحاب شركات الأدوية البيطرية (حيتان السوق) اللي بيلعبوا في سوق الدواء على مزاجهم .. وإحنا عارفين إن ما فيش تسعير للدواء وفيه تصعير (مع قلب الكلمة وجعل العين والراء بعد التاء) على دخول الدواء (المستورد – أو تحصينات إنفيلويسا الطيور مثلا ... إلخ) وعلى بيعه وما فيش رقيب والسوق مالوش كبير.
3- دكاترة الجامعة و دكاترة الفيلد (بس مش كلهم علشان ما يزعلوش) .. أنا بعد كل التعب ده أعلمك و تتطلع تقاسيمني في السبوبة .. أنا آسف على اللفظ .. بس أنا سمعته من دكتور متخصص في أمراض الأحصنة في نزلة السمان (طبيب بيطري بجامعة القاهرة).
4- مستوردي اللحوم والمواد الغذائية في مصر .. لاتعليق (أصل أنا بخاف منهم والحكومة كمان).
5- مسئولي الرقابة الصحية – والجمارك والمجازر وخلي الطابق مستور .. أو هات لي واسطة أشتغل معاهم.
6- الجزارين يعني ملوك البتيلو .. يعني الفخدة دي مزرره ولا من غير الزرار.
بس كده .. ده آخر كلامي اللي يشوف إزاي نقضي على مصلحة كل واحد من دول علشان نحقق مصلحة البلد اللي إحنا للأسف لسه عايشين فيها يبقى إحنا كده حلينا 80% من مشاكلنا وفاضل عليها حته صغيرة ياريت نسمعها ألا وهي التكليف - التكليف - التكليف .. أنا شايف تكليف وإمتياز طب بشري هو الحل بس يكون فيه دكاتره محترمة تعلم الناس الغلابة اللي متخرجة - يعني بعد التخرج سنة ونص تكليف إجباري يدرس الدكتور اللي إتخرج كل شهرين حاجة من اللي درسها ويكون عملي ويكون فيه دكاتره بتراعي ربنا تعلمهم.
أنا آسف على تطاولي وعلى حدة كلامي .. بس والله أنا بحب البلد دي زي ما بحب المهنة بتاعتي .. و شكرا لسعة صدركم.
ليست هناك تعليقات:
إرسال تعليق