بعد ما مات الكلام عن مذبحة ماسبيرو عشان جت عليها مذبحة جديدة و هى مذبحة شارع محمد محمود ده يخلينى أرجع للتقرير الغريب ده بتاع لجنة حقوق الإنسان اللى تحتيه مليون خط فى أحداث ماسبيرو, أنا مع الحقيقة أن هى اللى لازم تسود و مش العاطفة تكون الدافع للحكم عشان الحقايق تبقى واضحة بس أحنا بقينا فى زمن مفيش حاجة بقت تنفع تستخبى و لو كان زى ما التقرير بيقول فيه 66 جندى مات فى أحداث ماسبيرو فربنا يطرح لنا البركة فى الموبايلات كلها دلوقتى بتصور فيديو و بتلقط صور يعنى لو كان العدد ده صحيح كنا زمنا شوفنا فيديوهات كتير قوى عن جنازات جنود مصريين و بعدين هما بس الجنود دايمن اللى مضروبين على قفاهم و هما بس اللى بيموتوا يعنى مفيش ضابط ابن حلال كده مات كله جنود بس و لا يعنى عشان محدش حيهتم بأمرهم و لا غلابة و لا الموضوع أيه بالضبط!!, لا و أحلى حاجة أثناء الاحداث التليفزيون المصرى أيه صور على طول المجندين المصابين اللى متفهمش ازاى بقدرة قادر مفيش نقطة دم واحدة نزلت منهم و خصوصا الكتكوت اللى كان بيتلوى على السرير و الطبيب بيحاول يثبته على السرير الطبى أنى الاقى نقطة دم واحدة, أبدا!!, و النكتة بقى صور المجندين المصريين اللى وقفوا طابور التمام بتاع الصبحية و كل دراعاتهم الشمال يعنى مربوطة, شوفتوا الكوميديا, إيه محدش خد باله؟, الكسر كله يا أخوانى جه فى الدراع الشمال ما عادا واحد يتيم فى آخر الصف كسره كان يمين عشان التغيير يعنى و الناس متقفش أنها مقفوشة!!
أنا بتعامل مع التقرير بدون عاطفة بس التقرير فيه نقاط خلل كتيرة قوى مش مقنعة, التقرير بيتحدث عن شهادات ناس من العاملين فى ماسبيرو و دى فى حد ذاتها محل تجريح و شك و لكن بافتراض أنها صحيحة, التقرير وفق الشهادات دى بيتحدث عن معركة حربية حصلت جوا ماسبيرو لانه مذكور فيه جثث عساكر فى قلب المصاعد يعنى المعركة انتقلت إلى قلب مبنى ماسبيرو و الغريبة بقى أنه لم تسجل أى قناة فضائية أو أخبارية أو حتى كوميدية و لا حتى التليفزيون المصرى نفسه صاحب السبق الصحفى الرهيب فى تصوير الجولة الميدانية للمشير بالبدلة أنه ذكر أى خبر لاقتحام مبنى ماسبيرو و نشوب معارك طاحنة زى ما التقرير بيقول دى كانت حتبقى يعنى سبق صحفى ميتفوتش و بعدين الجزيرة تحب تلاقى جنازة و تشبع فيها لطم و عياط و الله دى كانت زاطط و عاشت على الخبر ده يجى تلات أسابيع!!
بعدين لما الجيش حساس قوى كده و خايف على معنويات جنوده سمح بالتقرير اللى بيتكلم عن 66 جثة يتنشر ليه؟!, مش دى معنويات برضه و لا تشنج عصبى و بعدين مفيش غير فيديو واحد بس يتيم لجنازة جندى واحد بس اللى نازلة على اليوتيوب و منتشرة على الفيس بوك, الله يرحمه و يجعل الجنة مسواه, تانى ده نقاش بالعقل مش بالعاطفة بتقولى بنشكك فى المجلس العسكرى طبعا هو محل شك كبير بعد التباطؤ الشديد فى ماحكمة رموز الفساد و أخص هنا مبارك و نجليه و العادلى مش شايفين أن أخبار محاكمتهم هما و العادلى ماتت تماما و محاكمة الضباط المتهمين بقضايا قتل المتظاهرين ماتت تماما و مديرأ من السويس بقت فى الفساكونية و مدير أمن البحيرة اللى قال على ضباط الشرطة أسياد الشعب و اللى يغلط يتقطع أيده أو لسانه مش فارقة, المهم أن فيه حاجة حتتقطع و ده يا اخوانى بعد الثورة, يا ترى حصل فيه أيه مدير أمن البحيرة ده؟ اتقرص من ودانه و قالولوه متعملش كده تانى يا وحش لحسن عسس يزعل منك!!
مش برضه المحاكمات الجميلة دى كلها عمالة كل شوية تتأجل و قضية خالد سعيد اللى عدت السنة و أتأجلت لحد ما طقهنا و عشان الناس ملت المسلسل خبطوا الضابطين المتهمين بتعذيبه حتى القتل يا دوبك كده عشان الحبايب سبع سنين!!, و قضية أمين الشرطة المعروف بأسم السنى الهارب اللى أخد اربع أحكام لحد دلوقتى و مستني الحكم الخمسة و عشرين منهم أتنين أعدام و واحدة مؤبد و آخر واحدة عشر سنين و لسه هارب و بيطلع فى الفضائيات!!, يا حلاوة و بعدين هو قتل المتظاهرين بتوع الثورة كلهم لوحده و لا أيه؟, أنا شايف أن الراجل كده غلبان عمال كل شوية يشيل حكم اللى جنبه لحد ما حيشيل أحكام كل القتلة!!
أموال الناس الفاسدة دى رجعت للدولة و لا أيه؟, أنا أقولك بقى مصانع حديد عز شغالة الله ينور و حسين سالم الشركات السياحة بتاعته هو و جرانة شغالة الله ينور, فلوس المغربى لم تمس بسوء, لم يتم الحكم على فتحى سرور أو زكريا عزمى إلى يومنا هذا و لم يتم إلى الآن البت فى قضية موقعة الجمل الشهيرة, كل التباطؤ ده و عايزانى لسه أثق فى نوايا المجلس العسكرى اللى ضرب المتظاهرين فى 8 أبريل و عدمهم العافية و اللى ضرب المتظاهرين من طلبة كلية الاعلام جامعة القاهرة و عدمهم العافية و قبض عليهم و اللى قبض عليهم فى الافطار الجماعى فى أول ايام رمضان و عدمهم العافية و لا حالات بقى كشف العذرية لمتظاهرات و لا مشوفتيش حضرتك شهادة البنت سميرة الغلبانة و الموثقة و أنهم خلوا البنت تقلع ملط و لا البنت دى غاوية يعنى تشوه سمعتها على مسمع من كل العالم و السلام, محدش يعنى حيقبض فلوس عشان يقطع فى شرفه خصوصا لو كانت بنت و خصوصا لو كانت فى مجتمع شرقى زينا و لا حضرتك لا سمح الله متعرفش عن كل ده.
تقدر تقولى ليه قانون العزل السياسى لنواب الوطنى المنحل لم يطبق إلى الآن و عليهم و عمالين يترشحوا للانتخابات كأنهم لا سمح الله عمرهم ما عتبوا عتبه الوطنى, المجلس العسكرى اعتمدها بعد زيطة و زمبليطة و سايب نواب الوطنى يترشحوا اللى أفسدوا الحياة السياسية , ما شوفتيش الفيديو بتاع تعذيب اتنين فى قسم الكردى من ضباط جيش و شرطة, مسمعتش كل شوية عن إحالة الضابط الفلانى للتحقيق عشان قتل مواطن فى القسم اللى شغال فيه و لحد النهاردة منعرفش نتايج التحقيقات أفضت لأيه, نسمع أنهم اتحولوا للتحقيق بس حصل معاهم أيه؟, الله أعلم!, متعرفيش حضرتك لما منصور العيسوى حلف و زبد و رغى أن مفيش قناصة فى الداخلية و طلعت الصور على النت تبين أن فيه ضباط قناصة من الداخلية و إيه اللى تم فى موضوع القاء القبض على القناصة اللى قتلوا المتظاهرين فى وشهم و صدرهم لا سمح الله عرفت حصل معاهم إيه و لا متعرفيش, طبق حضرتك الحد الادنى للاجور اللى هو 1200 جنيه, طيب بلاش اللى نزلوها بعد كده 800 جنيه, طب بلاش اللى نزلت بعد كده ل700 جنيه, اطبقت لا سمح الله, لأ لسه,هل تم إقرار الحد الاقصى للأجور بالنسبة للعاملين فى القطاع الحكومى؟, عندك إجابة, أنا عندى طبعا لسه لأن لسه فيه ناس فى الحكومة بتاخد مرتبات مليون جينه و اتنين مليون جنيه و بمئات الألوف, ليومنا هذا بياخدوا المرتبات دى و ناس تانية شغالة بعقود مؤقتة بقالها سنين و بتاخد 400 جنيه و أقل و لا سمح الله متعرفش.
أن عبارات ممدوح اسماعيل اللى موت فى عبارة السلام 98 يجى 1400 مصرى لسة شغالة حلاوة و لا متعرفش, طيب تعرف إيه مصير البلاغات التى قدمت للنائب العام فى حق أحمد شفيق أو حتى عمر سليمان, بس تعرف ان أحمد شفيق رشح نفسه لانتخابات الرئاسة!, و لا يجرؤ النائب العام أنه يستدعيهم أساسا للتحقيق معاهم فى البلاغات دى و لا أيه؟, متعرفش أن جهاز الكسب غير المشروع معرفش يمسك أى اختلاس على ممتلكات فتحى سرور لا سمح الله عشان طلع شريف و لا متعرفش!!
متعرفش أن الاتحاد الاوربى بيحقق فى قضايا نهب أموال لسوزان مبارك و هنا فى مصر سايبنها على حل شعرها و اشترت قصر جديد و خديجة و هايدى رفضوا يعيشوا فيه معاها, تعرف و لا متعرفش؟!, شكلك متعرفش!!, الكلام اللى بقوله ده بعد الثورة و اليومين دول هى مش الاخت برضه كانت اتخلت عن كل فلوسها و ارصدتها فى البنوك اللى هما 25 مليون جنيه و لا متعرفش, طب حد يحلها ليا دى جابت منين تمن قصر جديد هو ده مش كله بيحصل تحت سمع و نظر المجلس العسكرى و لا لأ لا سمح الله.
تعرف أن المشير غير شهادته فى محاكمة مبارك و قال أن مصدرتش أوامر رئاسية بضرب المتظاهرين و أحنا رفضنا فكرة ضرب المتظاهرين, مش ده اللى كان من كام شهر هو و سامى عنان بيقولوا أحنا جت لنا أوامر بالضرب و أحنا رفضنا من أول يوم نضرب المتظاهرين, أكيد دى بقى تعرفها كويس قوى, طيب ليه مرفضوش شهاداته باعتباره بيكذب و بيغير كلامه, أهى دى بقى لا أنا و لا أنت تعرفها بس أنا مخمنها لأنه كان هو و مبارك على تخته واحدة أيام المدرسة, حد يخون العشرة برضه, دى اللقمة الحرام متهونش !!
طبعا أنا فى نظر البعض أو ممكن كتير منهم أعوذ بالله منى عايز أولعها, عميل و خاين و بعمل لجهات أجنبية و بالتأكيد لجهة صهوينية أمريكية مريخية حلزونية!!, و ممكن كمان فاكر نفسى ثورجى نورجى و أنا أساسا مفهمش فى قشر البطيخ حاجة و فاكر نفسك يعنى بدافع عن البلد و أنا فى الأصل بخربها و مش بعيد أطلع شيوعى أو شيعى أو تربنتيعى أهو اللى يخالفك فى الرأى عادى قوى أنه يعلق لك حبل المشنقة, واحد حيقولى أنت متحامل على الجيش قوى كده ليه هو عشان سايبك حتغلط بقى و تقل أدبك مهو لو مسكك نفخك مكنتش قولت كده, ده على أساس أن أنا و أنت قبل 25 يناير و لا أيه؟
واحد تانى يقول مش الجيش ده اللى حمى الثورة و دافع عنك و رفض يضرب نار عليك و لا كنت عايز نبقى زى سوريا و ليبيا, مش الجيش ده لو حضرتك بس فاكر معايا كان الحرس الجمهورى كده عساكره كده بسم الله ما شاء الله عليهم كانوا واقفين صف الله ينور عليهم قمر اربعتاشر بيحموا الخيول و الجمال و البغال و العجول و ولاد التييت فى شارع الكورنيش متجهين بكل طيبة و حنيه لميدان التحرير لسحل المتظاهرين, أستنى بس قبل ما تنفخ عروقك و تكدبنى أدخل شوف الفيديو اللى بيصور المشهد ده من على اليوتيوب الله يكرمك, طيب شوفت البغال و كل السلاطات الحلوة دى و هى داخلة بقى على ميدان التحرير و بتعدى بطمأنينة و سلام ما بين الدبابات و ده لأن المجلس العسكرى بحكمته قرر يلتزم الحياد و يسيب ولاد التيت يقتل و يدبح فى ولاد الناس, حتقولى مهو لو كان الجيش ادخل كان المتظاهرين قالوا الجيش بيضرب فينا, تصدق و الله الناس كانت بتبوس رجل جنازير الدبابات عشان تدخل بس هو الحياد طبعا !!
مش كان فيه بعيد عنك و عنى طيارة أف ستاشر صوتها خرم طبقة الاوزون رايحة و جاية فى سماء ميدان التحرير و لا ده كان طيار ساعته وقعت منه فى ميدان التحرير و بيدور عليها !!, فاكر أحداث فبراير 3 و 2 و لا مش فاكر, فاكر قنابل المولوتوف و البلطجية اللى كانوا ليل نهار يهاجموا الميدان و قوالب الطوب اللى بتتحدف, الحق يتقال برضه الجيش كان قمة فى الحياد, أمال إيه يا جماعة يضرب البلطجية برضه, دول البلطجية من الشعب برضه!!
و بصراحة مننساش أبدا موقف المجلس العسكرى النبيل و هو بيشكر أهل العباسية الشجعان اللى تصدوا للعيال الثورجية دول ولاد اللذينة و نزلوا فيهم ضرب و موتوا فيهم واحد و أصابوا كتير قوى و الغريبة قوى بقى أنى شوفت أهالى العباسية معلقين يفط بتقول أحنا مش بلطجية و يفط تانية مهجمناش حد !!, غريبة قوى يمكن المجلس العسكرى بيشكر أهل العباسية اللى فى المريخ !!
و أمن الدولة بقى الأمن الوطنى و الشرطة فى خدمة الشعب و البلطجية فى خدمة الفلول و المجلس العسكرى و الحق يتقال زى الفل قايم بواجبه, لا فيه بلطجة و لا سرقة و لا تخريب و لا ترهيب و فى القوة شديد و فى الشدة حنين و هو أبوك و أمك و أنور وجدى أما أنا عينى عليه و مش خايف منه و مش بحبه و مش جريمة لما أقول أنا بكره المجلس العسكرى و مش شايف أن وجوده أمان على البلد و لا هو ولى أمرى و لا نيلة أنا ولى أمرى مستنى لسه أنتخبه!!
ليست هناك تعليقات:
إرسال تعليق