(1)
من بعيد شايف وشوش
معجونة بالخوف و القهر
و عارف ان وشى محفور
فى حيطة طوبها قديم
بينزف ملل و تقل دم
(2)
مرهونة حياتى بخيط طويل
ساعات بيتمايل و يتجن
خبيت نفسى جوا نفسى
و شمشمت على الايام
اللى سرح فيها الغم
(3)
المشاعر بقى لونها غريب
زى اللمبة الصفرا كئيب
و حدفت صوتى بعيد
رجع لى محشور بالحزن
و كلامى طالع متشخبط
بيجرى ويقع و يتخبط
(4)
العود بيعزف صوت مكتوم
و الوتر اللى كان مشدود
اتنطط و صبح مبروم
و النوتة بقراها معكوسة
و النغمة فيها محفوظة
(5)
بجرى برجل عارجة
بجرى قبل سواد الليل
ما يغطى اخر حتة
من نور السما السارحة
(6)
شديت على لسانى
طلع صوتى صدى
اتكيت بسنانى
على اخر كلمة
بس فلت منى السراج
و خرجت منى باردة
(7)
اصواتهم سكاكين حامية
حفرت نفق عميق
جوا ودانى
بتملى قلبى حواديت خايبة
فيها البواخة و الشماتة دايبة
ليست هناك تعليقات:
إرسال تعليق