3_7_2011
يوجد مسلسل جديد يعرض في الفترة الحالية علي القنوات الفضائية يسمي ابواب الخوف . وهو بطولة عمرو واكد ورانيا شاهين وجميل راتب وامير كراره وانجي المقدم وريهام امين وغيرهم .
تدور احداث المسلسل في اطار مرعب حيث يتحدث عن مخلوقات من ماوراء الطبيعه والجن والعفاريت والاشياء التي تحدث احيانا بدون ان نجد لها تفسيرات عقلانيه مقنعه وذلك كله من خلال شخصية الصحفي " آدم ياسين " الذي يحب القصص المثيرة والمرعبه واحيانا يحلم باشياء حدثت او سوف تحدث ويظل يبحث في كل حلقه عن الوقائع الغربية واسرار حدوث تلك الوقائع والجرائم ويتورط في بعض الحلقات مع الشرطه . وحلقات المسلسل جميعها منفصله .
بداية انا كنت منبهرة بالمسلسل لانه من خلال الاعلانات والشو الاعلامي الجامد بتاعه في معظم القنوات الفضائية من فترة كبيرة خلاني اقول ياه اخيرا معقول المصريين قدروا ينتجوا ويعملوا مسلسل يرقي لمستوي الافلام والمسلسلات الهوليووديه بالشكل ده . بس وبعد كده عينك ماتشوف الا النور وقعدت بقي اتفرج علي المسلسل التحفه اوي ده يادوب هي حلقه واحدة بس كانت كفيله بأني مشفش المسلسل ده تاني لاني لقيته للاسف الشديد ولاحباطي الكبير نسخه بس متعدله بالعربي من المسلسلات والافلام الهوليودية الامريكيه اللي الواحد لما يحب يترعبله حبتين يقوم متفرج عليها . للاسف مسلسل ابواب الخوف طلع متقارب قوي لمسلسل ghost whisperer الاجنبي
واللي تابع المسلسل الاجنبي ده هيلاحظ وجه التشابه الكبير مابينهم الا ان في المسلسل الاجنبي مكنتش البطله صحفيه ولا حاجه وكانت انثي بس هنا في ابواب الخوف بطل وصحفي وفي المسلسل بقي امور كتيره مقاربه للشعوذة .
لا وكمان حتي الصور والاشكال اللي بيجيبوها في مسلسل ابواب الخوف ترعب اكتر من المسلسلات الاجنبيه يعني فعلا مش هتقدر ولا هتجرأ تغمض ولا تبربش حتي بعينيك من كتر الفزع والرعب اللي انت هتشوفه علي شاشه التليفزيون الا بقي لو كان قلبك جامد قوي وواحد علي الحاجات دي وبتستحمل بقي .....
احنا هنا في مصر يعني مش نافقصين اصلا ويوم كمان مانقول مسلسل هيكسر الدنيا يبقي بالشكل ده؟
وقال كمان الاستاذ احمد خالد مخرج المسلسل اعترض علي ان احدي القنوات الفضائية حذفت مشاهد من المسلسل اثناء اذاعته وكان سببها في ده ان المسلسل بيعرض لمشاهد للابطال اثناء تناولهم للمخدرات وبررت القناه ذلك بانها تري ان هذه المشاهد حرام وتشجع علي تعاطي المخدرات وهذا يتنافي مع سياسه المحافظه للقناه ولقد حذفت القناه هذه المشهد دون الرجوع للمخرج .
طب ماكويس ان في قنوات محترمه زي دي وعلي كده يبقي كان المفروض انه يتحذف مشاهد كتيرة اوي من المسلسل ده او يبقي للكبار فقط لانه لا يستطيع قلب الطفل الصغير او عقله ان يتحملوا كم المشاهد المفزعه دي وحرام نرعب اطفال بالشكل ده بالمشاهد والصور والمكياج الموجود في المسلسل ده وأمثاله للشخصيات الغير مرئية اللي هي ماوراء الطبيعه
وقال في الاخر ان الناس عايزه جزء تاني منه . هي اصلا الناس ناقصه تترعب ماكفايه اللي شافوه حي وحقيقي من الرعب في ميدان التحرير والدم قدام عنيهم ايام الثورة .... يعني كفايه بقي اللي بيحصل فينا ده
ياريت بقي المخرجين والمؤلفين يبطلوا نقل بقي من مجتمعات تانيه ملهاش علاقه بينا اساسا و بعدين يبقي فين بقي الابداع والقصص المثيرة المختلفه اللي كانوا زمان بينسخوها مننا قبل مايبقي ليهم صيت سينمائي يغزو العالم .
وعجبي عليكي يامصر وعلي فن مصر.....
ليست هناك تعليقات:
إرسال تعليق