23-3-2014
قريت اعلان عن التعيين
نزلت منى دموع العين
جريت وشايل شهاداتى
فوجئت بطوابير بالملايين
انا قولت مفيش مستحيل
هقف حتى لاخر الليل
وكان الشىء الجميل
قفلوا الباب الساعه 2
حسيت انى فى السخره
ياولاد الإيه يا كفره
جاى ليكم تانى بكره
ومشيت مهموم وحزين
رجعت تانى يوم
عنيا مشافت نوم
غرقان فطابور وبعوم
ووصلت لحد الموظفين
قالولى هات الفيش
رديت انا معاييش
غير موقفى م الجيش
وبجد جدا متشكرين
مصاريف كدا بتزيد
غير مصاريف البريد
وكانه اليوم دا عيد
للواسطه والمرتشين
وادى الوظيفه راحت
اختاروا بس واحد
وريحة الكوسه فاحت
وسبكوها الطباخين
ده حكومه بتلم فلوس
بالجزم علينا بتدوس
وكاننا نمل وسوس
وانكشف وهم التعيين
بيتاجروا بطموح الشباب
سقونا الذل وشربنا العذاب
ومهما هربوا جاى الحساب
فى الدنيا وفى يوم الدين
ليست هناك تعليقات:
إرسال تعليق